Kohhran ten urhsun takin Good Friday an hmang
Khawvel puma Kristian-te hun pawimawh, Good Friday pual hian Kohhran hrang hrangte chuan Ningani zan khan Lung-ngaih zan inkhawm buatsaihin an hmang tan a, Kohhran tam ber chuan Inkhawmna neiin Lalpa Zanriah Sakramen an kilho a, Ke sil rawn-bawlna nei-a hun hmang te pawh an awm bawk. Nimin Good Friday kha Kohhran hrang hrang hian Pathianni anga serhin Inkhawmna hun ah an hmang bawk a, chawhma leh chawhnu bakah nizan lam thleng khan inkhawmna neiin thupui hrang hrang hmangin thuchah ngaihthlak a ni bawk.
Serchhip-a Roman Catholic te chuan Good Friday pual hian Isua tuarna an tawmpui zia lantirin nimin chhun dar 1:00 khan Serchhip Bazar atanga tanin P&E Veng-a Assumption Church thlengin Kros kawngzawh an nei a, he hunah hian Kohhran mipui thahnem tak telin chawhnu dar 3:00-ah Isua Kros-ah a thi tih lantir nan Kros chawimawina an nei bawk a ni.
Naktuk Pathianni hi Isua Krista thihna hnehna a thawhlehna ni, Easter Sunday a ni leh bawk a, he ni hi Kohhran hrang hrangte chuan urhsun takin an hmang leh dawn bawk a. Koh-hran Thalai ten zingkar-ah Isua Krista thawh-lehna thu hi kawtthler-ah te rimawi nen an puang leh dawn bawk a ni.
Comments
Post a Comment