ADC dangte thuneihna ang neih nan hmalak rel

Central Young Lai Association chuan Lai Autonomous District Council-in India hmarchhak State danga Autonomous District Council-ten thuneihna ang a neih theihna turin hmalak an rel.

Zirtawpni khan YLA Hall, Lawngtlai-ah YLA Rorel Inkhawm vawi 5-na neiin hemi chungchang hi an rel a, he Rorel Inkhawm hi Central YLA President HC. Vanlalruatpuia’n kaihruaiin rorel palai mi 212 an kal a, an thurel zingah Hlukhla Kût hlung taka hman a nih zel theihna tur leh LADC calendar-a kumtin tarlan a nih theihna turin hmalak ni se an ti a. Hei bakah hian Lai tawng inzirtirna lama hma kan sawn theih nan hmalak nise tih leh LADC huam chhunga environment humhalh chungchangah hmalak nise tih te a tel bawk a ni.

YLA rorel inkhawm-a General Secretary Joseph Lalhmingthanga Chinzah report-a a lan danin Central YLA hnuaiah hian Sub-Hqrs. 7, Group 6, Joint 2 leh Branch 115 awmin YLA member 56,369 an awm a. Central YLA website, centralyla.org chu tlangzarh a ni bawk.