MoS atanga RRR-a ban turin Petition thehlut

Minister of State Robert Romawia Royte chuan Section 9(A) Representation of the people Act 1951 a bawhchhia nia sawiin ZPM chuan nimin khan Mizoram Governor Dr. Hari Babu Kambhampati hnenah Minister of State atanga ban turin Petition an thehlut.

He Petition-ah hian ZPM aiawhin Vigilance Department-a General Secretary SL. Ngursailova Sailo chuan hming ziakin, “Pu Robert Romawia Royte hian The Representation of People Act 1951 bawhchhia in diklo takin a thuneihna hmang hlawkna a tel avangin (Office of profit) ZPM chuan Minister of State Pu Robert Romawia Royte hi Article 192 (1) to the Constitution of India thuneihna hmanga disqualify turin Governor hi kan ngen a ni,”a ti.

ZPM thuchhuah chuan Robert Romawia Royte hi Northeast Consultancy Services (NECS) neitu niin Vawiin thlengin chhiah pawh GST hnuaiah return a la file thu leh he firm hian duhsakna uchuak tak hmangin Mizoram sawrkar-a DC&MA nen Deed of Agreement chu Single Source Selection hmangin an ziak tih an sawi a. NECS hi Proprietorship, mimal sumdawnna a nih angin a neitu leh hlawkna teltu chu MoS Robert Romawia hi a ni tih a chiang hle niin an sawi a. “Assembly House chhungah a fapa ta anga a sawi pawh kha Election affidavit-ah a fapa hi a hnena innghat (dependent) a ni tih a tarlang a. Hei bakah Electoral Roll thar berah pawh chhungkaw khat, In khata cheng an ni tih a lang bawk. Mizo Customary Law hnuaiah a fapa hi ‘indang’a la nih loh avangin a fapa ta anga a sawi pawh hi a nihna takah chuan thuneitu leh enkawltu chu Minister of State hi a ni tih a chiang hle bawk,” an ti a. “Heng zawng zawng en hian Minister of State hian a thutiam bawhchhiain a thuneihna hmangin sawrkar atangin hlawkna a tel ngei a ni tih a tarlang a. Hei vang hian ZPM party chuan India danpui hnuaiah Minister of State a nihna atanga ban turin Governor hi kan ngen ta a ni,” an ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar