Latest News

Mizoram tharchhuah Hmarchate Nevada, USA-a thawnchhuah turin Minister in a vailiam

Lunglei, Siaha leh Lawngtlai District-a kuthnathawktute tharchhuah Mizo hmarchate (Bird's Eye Chilli) kg. 7500 chu Nevada, USA-a thawn turin nimin khan Agriculture Minister C. Lalrinsanga chuan Haulawng atangin a vailiam.

Mizo hmarchate USA a thawnchhuah hi International Competence Centre for Organic Agriculture (ICCOA) leh Mission Organic Mizoram (MOM), Department of Agriculture te tangkawp hmalaknain Mission Organic Value Chain Development for North Eastern Region (MOVCD-NER) hnuaiah kalpui a ni a, heng District pathum-a Farmer Producer Company (FPC) 12 hnuaia kuthnathawktute tharchhuah niin Lawngtlai District-ah FPC 6, Siaha District-ah FPC 3 leh Lunglei District External Audit of Organic Certification endikna vawi hnih hlawhtling takin an paltlang tawh a. Hmarchate phurtu motor hian Visakhapatnam, Andhra Pradesh thleng phurin hemi atang hian USA-ah thawn leh a ni dawn a, Sus Agri Development Pvt Ltd, Bengaluru, Karnataka te nena tangkawpa thawn a ni.

Haulawng YMA Run-a heng Hmarchate vailiamna puala inkhawm neih ah Agriculture Minister C. Lalrinsanga chuan Mizo kuthnathawktute tharchhuah in USA Market a thleng tur chu a lawmawmin a ropui takzet tih a sawi a. Mizoram-ah FPC hlawhtling taka kalpui mek a ni chuan Cooperative Concept anga hnathawh a that zia a tilang chiang hle tih a sawi a, kuthnathawktu te hmasawn zelna turin Agriculture & Allied Departments ten hetianga hmalak hi uar zawkin kalpui zel se a tih bakah Kuthnathawktute tharchhuahte State pawn leh ram pawna kan thawn zel theihnan an mamawh Cold Storage leh Solar Dryer te pawh ngaihtuah belh zel anih tur thu a sawi a. Uar zawka biofertilizer hman anih theihnan Department chuan nasa takin hma a la mek a, Sihphir, Neihbawih-ah Chemical tel lo Leitha, OP12 Bio Fertilizer siam chhuah mek zel a nih thu sawiin, State intodelh kan nih theihna turin kuthnathawktute an pawimawh takzet thu a sawi bakah taima taka hma la chhunzawm zel turin a chah bawk.

He hunah hian ICCOA Executive Director Manoj Menon chuan Bird's Eye Chilli thawn chhuah tur sample chu uluk taka enfiah niin Nevada USA-ah Final Testing neih a ni a, Chemical engmah hmuhchhuak lovin Organic Standards Protocol test hi an paltlang thu a sawi a. Mizoram Sawhthing leh Aieng te pawh demand a san thu sawiin, State dang leh ram pawnah te thawnchhuak thei turin FPC te nen hmalak tlan zel an tum thu a sawi bawk.

Comments

Popular News (Last 30 Days)