Aizawl-ah Union Home Minister a rawn zin dawn

Union Home Minister Amit Shah chu tun thla tawp khian Aizawl-ah a rawn zin dawn a, Union Home Minister lo dawnsawn dan tur hi nimin khan Chief Secretary Dr. Renu Sharma IAS hovin sawrkar mi pawimawh ten CS Conference Hall-ah an sawiho a ni.

Union Home Minister Amit Shah hian tun thla tawp March ni 31, 2023 (Zirtawpni) khian Aizawl a rawn tlawh dawn a, Zokhawsang-a Assam Rifles Complex a hawn dawn bakah AR Ground sir a Laldenga Cultural Centre sak tur lungphum a phum bawk ang. He thutkhawm ah hian Chief Secretary chuan hun chep tak karah fim-khur tak leh uluk taka ruahmanna siam a tul avangin theihtawp chhuah theuh turin kalkhawmte chu a chah a ni.

Nimin-a thutkhawm ah hian Zokhawsang a Assam Rifles Complex satu Engineering Projects (India) Limited pawh telin, anni hian an hnathawh hrang hrang Component 13 an zawh vek thu leh quarters thenkhat Assam Rifles hnena hlanchhawn tura an pek tawh, Assam Rifles lamin an lakchhawn theih rih loh chi ah mutan an neih thu an sawi a, Assam Rifles aiawh Meeting a telte leh State sawrkar Official te nen sawiho a nih hnuin Vawiin March ni 15, 2023 chawhnu dar 2:30-ah a hmunah a huhova endik tum a ni a. Helei hmuna Union Minister hova Official Function neihna tur hmunhma te pawh enfel nghal tum a ni.

AR Ground hmar lam-a Laldenga Cultural Centre sak tura ruahmanna siam mek chu Aizawl Smart City Project hotuten nimin a thutkhawm ah hian powerpoint hmangin an sawifiah bawk a, cheng nuai 193 senga sak tura ruahman niin 75 metre x 90 metre a zau a ni ang.