Durtlang Leitan-Sihphir kawng zauh bultanna nei

Durtlang Leitan leh Sihphir inkar kawng KM 10.25-a thui zauh leh siamthat hna thawh tanna tur puala lungphun chu Inrinni khan Chief Minister Zoramthanga chuan a hawng.

He kawng siam hna hi Central Road Infrastructure Fund (CRIF) atanga sum hmuh hmanga thawh tur Widening and Improvement of Aizawl - Durtlang - Lungdai - Kawnpui Road Project-a Section pakhat niin tuna hnathawh turah hian kawng laih zauh hna te, kawng kual ulh leh chho ulh zual leh kawng chhuat siam hna te thawh a ni dawn ta a ni.

Hemi atan hian CRIF atangin cheng vbc. 46.57 hmuh niin he kawng hi BRO enkawl a nih avangin a kawng enkawltu BRO hnen atangin PWD kuta hlanchhawn phawt a tul a, chu chuan hun a duh rei deuh avangin duh angin a hna hi tan mai theih a ni lo a. Ministry of Defence atanga phalna hmuh hma chu BRO te'n No Objection Certificate an pek theih loh avangin Sawrkar laipui lamah sawrkar hotu ten bawhzui lehin Chief Minister in Defence Minister a hmuh hnuah NOC hi pek a ni ta a ni. Heng bakah hian CRIF Scheme hnuaiah hian Compensation pek tur sum dah tel a ni ngai lova, hei vang hian kawng kam-a huan lo ram neitute phalnaah thui tak a innghat bawk a ni.

He kawng laihzauh turah hian kawng chhuat zau zawng chu meter 8 ni tura ruahman niin Motor zawh tur chin chu meter 6 a ni anga, mm 10-a chhah Granular Sub-Base (GSB); mm 150-a chhah Dry Lean Concrete (DLC) leh 250 mm-a chhah Cement Concrete Pavement in kawng hi siam tur a ni dawn a, Retaining Wall leh RCC Frame Retaining Wall 32 siam tur awmin Culvert awmsa zawm belh tur 18 a awm bawk a. Hume Pipe Culvert siam belh tur 4 a awm bakah Road Safety items leh Traffic signages tar a ni dawn bawk a ni.

Kawng laih tanna puala Rohrenga Hall, Sihphir a inkhawm buatsaihah Chief Minister Zoramthanga chuan helai kawng zauhna tur Project nawr chhuak tura kawng a khirhkhan thu leh tuna hna thawh tan a ni dawn ta chu lawmawm a tih thu a sawi a. National Highway anga Compensation Component dah a nih ve loh avanga helai kawng zauhna atana sawrkar ram bak ram lak hek ngai te chu zangnadawmna in pek theih a nih loh thu sawiin, hemi a nih avanga sawifel ngai a awm thu te, ram neitute leh khawtlang hruaitute leh tlawmngai pawl te thawkho a theihtawp chhuaha he kawng pawimawh tak hi tha taka kalpui a nih theih nan inhawng taka theihtawp chhuah tlan a ngaih thu te a sawi bawk. He hun hi PWD Commissioner & Secretary K. Lalthawmmawia chuan kaihruaiin PWD E-in-C Er. C. Lalchhuana chuan report a pe bawk.