Kamrul-a Trolley lei tir

Lengpui Airport-a Trolley chhia te chu a tichhe tam ber nia ngaih Kamrula chu Trolley 100 lei tura an tih thu Chief Minister Zoram-thanga chuan sawiin, tun dinhmunah Trolley 70 vel hman theihin a awm mek tih a sawi.

    Mizoram Assembly Budget Session neih-ah a demand khaikhawmna-ah he thu hi sawiin Chief Minister chuan Lengpui Airport cheithat hnathawh chungchangah Covid period-ah passenger tlem lai chuhin pindan hrang hrangte thiah dar a ni tih a sawi a, Trolley dahthat ve na te pawh Room a awm tawh si loh avangin thil nawr mai na atan a rem hle tih a sawi a. “Contractor in Cement leh tui te bakah, Police leh CRP te tan hman a rem em em a, kan hriat loh in an lo tichhe teuh mai a, kan hriat hnuah kan inkhap a, tichuan a chhia kan repair tir a, tunah chuan 70 vel a tha pangngai a awm a, chu chuan hman tawk a dawlzo thawkhat a, mahse 100 dang lei ang kan ti a, Contractor Kamrula chu i hoten an tichhe tam ber kan ti a, pawisa i ngah ber ang, lei rawh kan ti a, 100 vel ka lo lei ang a tia, 170 vel chuan harsatatna a awmlo turah kan ngai,” a ti bawk.