Mizo thalaite hamthatna tura Election Manifesto-a tarlan kum 4 chhungin tih hlawhtlin vek a ni - MNYF

MNF Thalai, Mizo National Youth Front (MNYF) chuan MNF-in Mizo thalaite hamthatna tura Election Manifesto-a a tarlante chu kum li chhungin a tihlawhtling vek tawh tih sawiin, “Chief Minister Pu Zoramthanga kaihhruai MNF sawrkar hian Mizo thalaite hmasawnna turin nasa takin hma a la,” an ti.

Inrinni-a Aizawl Press Club-a thuthar thehdarhtute an kawmna ah MNYF Vice President Zodinpuia chuan MNF chuan kum 2018 Election Manifesto-ah Mizo thalai leh zirlaite hmasawnna tur point 11 a chhawpchhuak tih sawiin, COVID-19 leng avanga ni 718 zet lockdown kalpui a nih avanga sawrkarin hna mumal a thawk thei lo chungin thalaite hamthatna tur hi an tihlawhtling vek tih a sawi a, “Mizo thalaite MNF sawrkarin a ngaihsak a ni,” tiin, “Eptu party leh mi thenkhat, sawrkar hmalakna sawi bawrhban tum a hmanhlelte avang hian MNF chuan Mizo thalaite hmasawnna tura ke a penna hi chawlhsan a tum lo a, theihtawp a chhuah zel dawn a ni,” a ti bawk.

MNYF Vice President-in sawrkar hmalakna a tarlante chu - Thalai hna zawng Employment Exchange-a in-register tur ten awlsam zawka Online hmanga an in-register theih nan Employment Exchange Portal thar, ‘EMPEX’ chu buatsaih a ni a. LESDE Department hnuaiah Mizo thalaiten eizawnna ngialnghet an neih theihnan Recognition Prior Learning Programme kalpui a ni a. Thalaiten thiam thil chi hrang hrang an zirna tur Govt. ITI Aizawl, Lunglei leh Siaha a kan neih bakah Champhai, Serchhip, Thingdawl leh West Phaileng-ah te ITI thar dinna tur building sak mek a ni. Kum 2021 atang khan Mizo thalai thiam thil neiten an thilsiam chhuah hmang a intihsiakna leh intawhkhawmna, PUM (Innovation Fair) buatsaih thin a ni a. ITI atanga zirchhuak thalaiten bul an tanna turin KAWTCHHUAH (Start-Up Fair) chu kum 2022 atangin buatsaih tan a ni bawk.

Heng bakah hian Mizoram sawrkar in Mizo thalaite World Skills Competition-a an tel ve theihna tura inbuatsaihna a kalpui mek te, MYC Office changtlung tak siam te, thalai hna zawng mek te leh hnathawktu tur mamawh tan HNAINPUI.COM (Online Job Portal) siam te, kum 2022 - 2023 atan Super IAS 40 kalpui leh Coaching Programme leh Coaching Centre hawn belh bakah Mizo thalai SSC/IPBPS exam hmachhawn turte tan Coaching Class Aizawl leh Lunglei-a kalpui te a tel a ni.