Zofate Lairelna Inpui in Assembly inthlanpui ah Candidate siam tumin pahnih an puang nghal

Zoramthar tia hriat, Zofate Lairelna Inpui chuan kumin a Mizoram inthlanpui neih tur ah Candidate an siam dawn tih sawiin, an hruaitu (President) Rev. Dr. Zaichhawna Hlawndo chu Hrangturzo bial-ah leh an Ziaktu Lian (Secretary) Lalruatfeli Hlawndo chu Aizawl North-I ah a din dawn thu an sawi.
Nimin-a Serchhip Press Club-a thuthar thehdarhtute an kawmna ah Rev. Dr. Zaichhawna Hlawndo chuan kum 2012 khan Lalpa’n,‘I pianna ramah kir leh rawh, Zoramthar ka din dawn. Ka chhiahhlawh te in intelkhawm anga, chung mi te hmang chuan ka Lalram sawrkar, ka lalna ka din dawn,’ tia a hriattir angin chumi atan chuan theihtawp chhuahin Lalpa’n tihtur a hriattir angin an ti chho tih a sawi a. Kum 2023 chu a hmawrbawkna tur a lo ni ta tih Lalpa’n a hriattir thu sawiin, Lalpa Chhiahhlawh Intelkhawm te puanzar (Flag) chu a tlangzarh nghal a, an Puanzar rawng leh thil inziak te sawiin, an Puanzar-a Zungbun inziak chu kumin inthlanpui ah Symbol atan an hman dawn thu a sawi bawk.

Rev. Dr. Zaichhawna Hlawndo te chuan Lalpa Chhiahhlawh Intelkhawm te chu Pawl leh party an ni lo tih sawiin, Kohhran pawl hrang hrang leh tihbik nei lo an ni tih a sawi a, kumin a an Candidate tur a puan pahnih te hi an pianna khua ah ve ve ding tur an nih thu leh midang te pawh an la awm belh zel tur thu a sawi a, heng mite hi Lalpa lalram sawrkar a lo din theih nan Chhiahhlawh ah an inpek dawn thu leh Symbol thuhmun hmangin Independent-a an din dawn thu a sawi a. Inthlanpui-a an din dawn avang hian lal-a rorel ve an tum tihna a ni lo tih pawh sawiin, “He ram leh hnam hi a dam lo a, Pathian in tihdam a duh a, Lalpa lalram dinin Hnam kaihthawh a ni anga, Zoramthar a lo ding ang,” a ti bawk.

He hunah hian Zofate Lairelna Inpui-a Ziaktu Lian Lalruatfeli Hlawndo pawhin kum 2018 inthlanpui-ah khan Zoramthar anga an din loh thu leh Zoramthar chu Pathian Lalram a din huna a hming tur a nih thu a sawi a. Kan ram-a Political Party te Unit chu kan ram chhiatna bul a nih thu leh chu chu do tlat tura tih an nih avangin Party awmsa ah pawh lut thei an nih loh thu a sawi bawk.

Zofate Lairelna Inpui hruaitute chuan Vawiin hian Hrangturzo bial-a East Lungdar-ah an kal dawn thu leh an bial chhunga khaw hrang hrangah ‘Fang rual Tawngtai beihpui’ an neih zui dawn thu pawh an sawi bawk a ni.