Serchhip District-ah nikum chhungin TB vei 82 hmuin TB vei mi 2 ten chawtha eina tur an dawng mek
Serchhip District TB Centre atanga thu kan dawn danin nikum chhunga Serchhip District-a Tuberculosis (TB) vei hmuhchhuah mi 82 zinga mi 52 te chu Chuap TB niin a dang 30 te chu taksa peng dang TB te an ni thung a, TB vei hmuhchhuahna atana hman ber Cartridge Based Nucleic Acid Amplification Test (CBNAAT) hmangin Sample 413 enfiah ah TB vei mi 47 hmuh niin Microscope hmanga Sample enfiah 419 atangin TB vei mi 6 hmuh an ni bawk. Nikum chhung vek khan Serchhip District-ah TB dam har chi, Multi Drug Resistant-TB (MDR-TB) vei mi pahnih hmuhchhuah an awm bawk a, TB vei hmuhchhuah zinga mi 11 te chu HIV hrik pai an ni bawk. Nikum chhung khan Serchhip District-ah TB vei mi 4 thiin an zinga mi pathum te hi Serchhip khua an ni a, midang pakhat hi Keitum khua a ni thung.
Serchhip TB Centre-a thawktute chuan Serchhip District-a TB vei hmuhchhuah te hian TB damdawi an ei tha tlangpui tih sawiin, tunah hian TB damdawi ei lai mi 40 an awm mek thu leh TB vei lai mi 40 awm ang an nih thu an sawi a, nikum-a Serchhip District atanga TB vei hmuhchhuah mi pahnih erawh chuan damdawi hi an ei zui loh thu sawiin, pakhat hi natna dang a neih avanga ei zui thei rih lo a nih thu leh a dang pakhat hi raltlan-a rawn lut, a hnua a awmna chin an hriat zui tak loh a nih thu an sawi a. TB damdawi hi thla ruk (6) chhung ei tur te a nih thu an sawi bawk.
Ramchhunga TB natna umbo a nih theihna tura hmalakna pakhat, Prime Minister TB Mukh Bharat Abhiyan hnuaia Ni-kshay Mitra hmangin Serchhip District-a TB vei enkawllai mi pahnih te chuan chawtha an eina turin mi inphal te atangin thla tin tanpuina an dawng mek tih thawktute chuan an sawi bawk a. TB vei te hi an damdawi ei hun chhung a rei avang leh hna te an thawh theih loh bakah an taksa in chawtha a mamawh bawk si avangin he ruahmanna hnuaiah hian mi tlawmngai ten sum leh pai hmangin TB vei te tan chawtha man tur thla tin an pek thin thu an sawi a. Tuna tanpuina dawng mek te hi a sponsor-tu te hian thla tin Rs. 1000/- an pek thu leh mi tlawmngai dang te pawhin rawn ti zel se an duh thu an sawi a. Damlo te tana thla khat a sponsor theihna zat hi mahni inhuam ang zela tih danglam theih a nih thu pawh an sawi bawk. Rampum-a kalpui mek he ruahmanna hnuaia tanpuina dawng turte hia TB vei te dinhmun leh khawsak harsat dan atanga chhutin an thlang thin tih pawh sawiin, hetiang mamawh tak tak hi an tam thu an sawi bawk a ni.
Comments
Post a Comment