North Vanlaiphai in Agri. Office sawnchhuah duh lo

North Vanlaiphai-a NGO Co-Ordination Committee chuan an khuaa Block Agriculture Office sawnchhuahna thupek a rang thei ang ber a sut lehnghal tura sawrkar dinglai an phut thu an sawi.
    Nimin-a thuchhuah an siamah North Vanlaiphai NGO Co-Ordination Committee chuan January 30, 2023-a Mizoram sawrkar in lehkha a tihchhuah ah hun engemawchen N. Vanlaiphai khuaa lo awm tawh Block Agriculture Office chu N.Vanlaiphai khua atanga E. Lungdar-a sawn tur anih thu tihchhuah a ni chu an hriatin N.Vanlaiphai mipuite chu an rilru a nain an lung a awi lo takzet tih an tarlang a. N.Vanlaiphai khua chu Mizoram-ah Agriculture hmunhma nei tha pawl an nih thu leh hei vang hian Agriculture Department dah hmasakna pawl niin March 4, 2021-ah Block Agriculture Office-ah hlankai a nih thu an sawi a.

Hetianga khawtlang mipuite mai bakah a khaw chhehvela mipuite tana Office tangkai tak a nih mek laia N. Vanlaiphai atanga khaw danga sawn chhuak tura Sawrkar thuchhuak a awm ta mai hi mipuite chuan an hrethiam lovin an rilru a na takzet tih an sawi a. He Block Agriculture Office sawn chhuah hi kan remti ngai dawn lo tih an sawi a. An khawtlang hruaitu (Village Council)-te leh Ruling Party hruaituten he thupek sut leh tura Feb. 17, 2023 thleng sawrkar ngaihchan nise an ti leh an hmalakna hrang hrangte chu a tawp thlengin an thlawp tlat dawn tih an sawi bawk.