North Eastern Council kum 50 tlin lawmna Chief Minister Zoramthanga hovin hman a ni

North Eastern Council (NEC) Golden Jubilee lawmna chu nimin khan Aizawl Sipai Lammual-ah Chief Minister Zoramthanga hovin neih a ni.

    NEC Golden Jubilee lawmna hi nikum December 16 khan Prime Minister Narendra Modi hovin NEC hmunpui, Shillong-ah neih a lo ni tawh a, North East State hrang hrangah tunah hian a lawmna neih leh mek niin Mizoram-a a lawmna chu nimin khan neih a ni a. He hunah hian Chief Minister Zoramthanga chuan North Eastern Council Golden Jubilee lawmnaa kalkhawm te chibai bukin, “Pathian in malsawmna min pek NEC chu tungnung a, tichangkangin, i kalpui zel ang u,” tiin mipuite a sawm a ni.

Chief Minister chuan India hmarchhak State te tan Sawrkar laipui chuan a bikin pawisa a sanction thin tih sawiin, “Hmasawnna sum thalna khurbik kan nei a, NEC avang hian Mizoram leh hmarchhak State ten kawng hrang hrangah hmasawnna kan neih phah hi a lawmin a ropui em em a ni,” a ti a. North East State te zingah Mizoram chu State lian ber leh mipui tam berna ni lo mahse State dangte entawntlakin kan siam thei tih a sawi a. Mizoram chu lehkhathiam rual awm khawmna, khawtlang inpumkhat leh tanrualna ram a nih thu pawh sawiin, State dang te tan rinawmna leh inhmangaihna kawngah te, tlawmngaihna ah te entawn turin awm zel ila, Mizoram hi a hmahruaitu ah tan tum ila, tiin ram mipui te chu a fuih a. “Tunah pawh remna entirnan ram ralmuang ber kan ni a, kawng chi tinrengah entawn turin kan theihtawpin i bei zel ang u,” tiin a sawm a ni.

NEC Golden Jubilee lawmna a Khual zahawm State Planning Board Vice Chairman H.Rammawi pawhin India sawrkar chuan hmarchhak State te hmasawnna turin sum leh pai kumtin kan ta tur bik a dah hrang tih sawiin, hamthatna kan dawn theih nan NEC leh DoNER Ministry te min siam sak a. Mizoram leh India hmarchhak State te tan chuan North Eastern Council hi a hlu hle a ni, a ti a. Golden Jubilee ropui taka lawm hi a phu takzet a ni, a ti bawk.

NEC Golden Jubilee lawmna pual hian Tug-of-war intihsiak buatsaih a ni a, Mipa team 55 tel zingah Durtlang North chu pakhatna niin Sihphir in lawmman pahnihna leh Leitan in lawmman pathumna an dawng a. Hmeichhia Team 16 zingah Durtlang North chu pakhatna niin Zemabawk North chu pahnihna leh Sihphir chu pathumna an ni a. Khuallian Chief Minister Zoramthanga chuan intihsiakna a lawmman te hi a sem a ni.