Naupang huaisen chawimawina dawngtute Minister in kawmin lawmpuina a hlan

Zonuna Kawlni (LENKAWL) • February 1, 2023 • Comments • Mizoram

Kumin-a India Republic Day lawmna New Delhi-a neih tuma Mizoram atanga naupang huaisen chawimawina dawngtu mi pali (4) te chu nimin khan Social Welfare Minister Er. Lalrinawma chuan a Office-ah kawmin chawimawina an dawn a lawmpui thu a sawi.

    Tarlan tawh angin January 26-a India Republic Day lawmna New Delhi-a neih ah khan ramchhunga naupang huaisen chawimawina hi semchhuah niin Mizoram atangin mi 4 in India President hnen atangin National Bravery Award hi an dawng a, an zinga pahnih te Serchhip District niin Christian Vannunzira S/o Rosangzuala, Chhingchhip chuan Abhimanyu Award dawngin General Award chu Vanlalfela S/o Lalrinthanga, Thenzawl Venghlun chuan a dawng bawk a. Anni bakah hian Jolyn Malsawmsanga S/o Lalmuankima, Pukpui Lunglei leh Lalramliana S/o Lalrinchhana, New Hruaikawn, Champhai District te chuan General Award hi an dawng bawk a ni.

Nimin a heng naupang huaisen te a kawmna ah hian Mizoram State Council for Child Welfare (MSCCW) President ni bawk Er. Lalrinawma chuan Mizo naupang leh Zofa chhulchhuak zingah President Award dawng thei an awm chu lawmawm a tih thu sawiin, thinlung takin a lawmpui tih a sawi a. Ram leh hnam tan mi chhuanawm leh entawntlak ni zel tura chahin, an hun hman leh zel turah duhsakna a hlan a ni. Naupang rilru thianghlim takin mahni mihringpui chhanhimna atan nunna thapa an thawk chu ropui a tih thu Minister chuan sawiin, “An thiltih chuan midangte chona a pe nasa hle a ni,” a ti a. Hetiang Award dawng thei Zofaten kan nei hi a ropui a, nu leh pa ten kan fate enkawl thiam a ruihhlo laka fihlim tur leh huaisen inzirtir zel turin a duh thu a sawi bawk.

COVID-19 avangin kum hnih chhung Award hi a taka sem thei a ni lo a, chuvangin kum 2021 atanga 2022 chhunga huaisen lawmman latute chu tum khatah sem a ni a. Mizoram atang hian kum 2021-ah mi pathum in an dawng a, kum 2022-ah pakhatin a dawng leh a, State 17 atangin naupang 56 in an dawng a ni. Award lawmman lakna a kal te aiawhin an hun hman dan Lalengkima chuan he hunah hian a sawi bawk a. Social Welfare Board Vice Chairman K. Liantlinga pawhin thu a sawi bawk a ni.