Vengchung Branch Champion
October 25, 2022 atanga Serchhip Sports Complex-a khelh Serchhip Sub-Hqrs. YMA buatsaih Inter-Branch YMA Football Tournament hi nimin khan Final khelh niin Chhingchhip Venghlun Branch YMA leh Serchhip Vengchung Branch YMA te an inhmachhawn a, hun pangngai ah goal khat ve ve inpe-a inhnehtawkin Extra Time khelh zui a ni a, hetah hian Vengchung Branch YMA te hian goal hnih khungin 3-1 in hnehna an chang zui ta a ni.
He inkhel ah hian Serchhip Vengchung Branch YMA te hian minute 14-na ah PC. Lalremruata goal khung hmangin hma an hruai a, Chhingchhip Venghlun Branch te hian sut tum viau mah se an sut mai thei lova, Serchhip Vengchung Branch te an chak tlang mai dawn emaw tih hnu minute 90+3 ah Lalhruaitluanga chuan Chhingchhip Venghlun Branch tan goal a rawn khung a, hun tawp zuiin 1-1 in an inhnehtawk a ni. Hun pangngai a chak zawk an awm loh avangin Extra-Time khelh zui niin minute 99-na ah Lalruatdika chuan Serchhip Vengchung Branch YMA tan goal a rawn khung a, hemi hnu lawk minute 103-na ah Lalchawimawia chuan rawn khung belh ve lehin hun a tawp meuh chuan 3-1 in Serchhip Vengchung Branch hi an chak ta a ni.
He Tournament-a Champion Serchhip Vengchung Branch te hian Dekchi lian bakah Rs. 50,000/- leh Certificate an dawng a, pahnihna Chhingchhip Venghlun Branch in Dekchi lian bakah Rs. 25,000/- leh Certificate an dawng bawk a, Semi Final-a chak lo New Serchhip Venglai Branch leh Neihloh Branch ten Rs. 7000/- ve ve an dawng bawk a ni.
Tun tum Tournament-ah hian Jerry Laldikkima (Vengchung Branch) chu Best Player-ah thlan niin Goal 8 khungtu Lalhruaitluanga (Piler Branch) chu Top Scorer a ni a, KC. Lalruatkima (Vengchung Branch) chu Best Goalkeeper niin Best Defender-ah Lalramnghakmawia (Neihloh); Best Midfielder-ah Lalnunpuia Royte (Chhingchhip Venghlun) leh Best Forward-ah Lalruatmawia (Chhingchhip Venghlun) te thlan an ni a, Trophy leh pawisafai hlan niin Chhingchhip Venghlun Branch hnenah Fair Play lawmman hlan a ni bawk.
Comments
Post a Comment