Mizoram-a Chikungunya leh Dengue leng in ziaawm lam a la pan thei rih lo

Mizoram-a Chikungunya leng mek chuan ziaawm lam a pan lo mai ni lovin October thla chhung ringawt khan mi 40-in he natna hi an kai tih hmuhchhuah a ni a. Hetihlai hian October thla chhung khan Mizoram-ah Dengue hri kai hi mi 568 hmuhchhuah niin he hri kai zingah mi pathum an thi tawh bawk.

Mizoram sawrkar-a Health Department Joint Director (Malaria) Dr. Hmingthanmawii sawi danin Mizoram-a Chikungunya leng mek hian ziaawm lam ala pan thei lova, Chikungunya natna vei tawh hi kumin January ni 1 atanga November ni 6 thleng khan mi 53 an tling tawh a, an zinga 40 hi October thla a he hri kai ni an ni a, nunna chan phah erawh an la awm lo a ni. Chikungunya natna hi Lunglei District-ah a darh nasa ber a, mi 47-in vei tawhin Lawngtlai District-ah mi 4 leh Aizawl District-ah mi 2 te’n an vei bawk a ni. Chikungunya hi hun engemaw chen atang khan Mizoram-ah a lo awm tawh a, kum 2020 phei kha chuan mi 67 in an vei a, kum 2018 khan mi 10-in an vei bawk.

Hetihlai hian Mizoram-a Dengue hri leng mek chuan zual lam a pan zel a, Dr. Hmingthanmawii sawi danin Dengue vang hian October thla khan mi 2 thiin November thla-ah mi pakhat a thi leh bawk a, Aizawl District ami vek an ni. Dengue hri hi kumin kum bul lam atanga leng tan a ni a, a tirah a nasa vak lo mah se August thla chhung khan he hri kai hi mi 84 hmuhchhuah a ni a, September thla-ah mi 159-in an kai a, October thla-ah mi 568 zetin an kai a. Kumin January atanga October ni 31 thleng khan Mizoram-ah Dengue hri kai mi 895 an tling tawh a ni. Dengue natna vei hi District dangah a awm ve na-in Aizawl leh Lunglei District-ah a hluar zual a ni.

Mizoram-a Dengue natna hmuhchhuah hmasak ber chu kum 2013 kha a ni a, mi 7-in an vei tih hmuhchhuah a nih thu State Vector Borne Diseases Control Programme hotute chuan an sawi a. Kumin hma lama Dengue hri kai hmuhchhuah tam ber kum chu 2016 kha niin mi 580 in an kai a ni. Dengue leh Chikungunya hi Thosi chi khat Aedes in a pu darh a, hetiang Thosi hi Mizoram-ah a tam avangin fimkhur turin Health Department chuan mitin a chah a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar