Vairengte dai-a kawngpui dan tihtawp a ni

Kolasib District Land Owners Association-in Vairengte daia kawngpui an dan chungchangah Mizoram Sawrkar ngen angin Central YMA hruaitute chuan Palai hna thawkin Inrinni khan Vairengte-ah Kolasib District Land Owners Association hruaitute nen inkawmna an nei a, he hunah hian Central YMA hruaitute chuan Mizoram ei leh bar lakluhna kawngpui ber danchah chu thil fel ber a ni lo tih sawiin, Zoram mipuiten an tawrh loh dan zawnga hmalak dan ngaihtuah turin Land Owner Association chu a sawm a, kawngpui an dan mek chu an titawp a nih chuan puih an ngaihna apiangah Central YMA chuan a puih tur thu an sawi bawk.

Land Owner Association hruaitute pawhin, Central YMA hruaitute ngenna chu zahawm an tih thu sawiin, ngun taka an ngaih-tuah hnuah kawngpui an dan chu tihtawp remti in Inrinni tlai dar 4:30 atang khan kawngpoui dan hi tihtawp a ni a. Hetihrual hian ram neitute chuan an thil phut chungchangah tun thla ni 30 ralhmaa thu lawmawm an dawng lo a nih chuan an kal zel dan tur rel leh an tum a ni.