Mizoram Governor in Mamit District a tlawh

Mizoram Governor Hari Babu Kambhampati chuan nimin khan Mamit-a Central Scheme - PMAY(U) leh PMUY hnuaia beneficiary te a tlawhin sawrkar atanga hamthatna an dawn dan leh an hmalakna te a zawtfiah.

Zan khat riaka Mamit-a zin Governor hian nimin khan PMAY(U) leh PMUY hnuaia beneficiary te tlawhin Insak leh Gas Connection atana tanpuina dawngtu te chu an hmalak dan, an senso leh sawrkar tanpuina an dawn chungchangah an lungawi em tih te a zawt a. PMAY(U) hnuaia In satu te chuan Governor hnenah an chenna In sak nan sawrkar in Scheme tha tak a ruahman chu lawmawm an tih thu lo sawiin, In la sak zawh loh te pawh a tlawh nghal bawk a. In sa mek te hian sum hlawm hmasa chu an dawn tawh thu sawiin, a thawhhnih an dawn leh thuai erawh an mamawh tih an sawi a ni.

Governor hi PMUY Scheme hnuaia eirawngbawlna gas dawngtu te Inah lutin an ngaihdan te a zawt a. Pradhan Mantri Ujjwala Scheme hi Prime Minister Narendra Modi-a’n hmeichhia te hriselna a ngaih pawimawh avanga siam anih thu a sawi a. Hmeichhiate an lo hrisel zawkna atan leh hmeichhiate chawikanna atan PMUY Scheme chu duan anih thu a sawi a ni. Governor chuan sawrkar laipui atanga hamthatna dawngtute chu a lawmpui tih a sawi a. Beneficiary te chu an thiante tanpuina dawng awm nia an hriat, dawng rih lo an hriat chuan heng Scheme tha tak tak chungchang te hi hrilh ve turin a chah bawk.

Governor Hari Babu Kambhampati hian niminpiah khan Mamit hi thlengin DC Office-ah sawrkar Department hotute nen inkawmna an nei a, he hunah hian Governor chuan Aspirational District pawimawh zia leh sawrkar Schemes hrang hrang te chu a nihna ang tak a hman anih theih nan Government Officials te leh Bankers te an theihtawp a hma la tur in a fuih a. Project thenkhatte thawh chhung a rei lutuk thin leh a thawh hun chhung pawhsei a ni fo thin chu thil fel lo tak a ni, tiin heng project te hi a hun taka zawh theih dan Official ten an ngaihtuah thiam tur a ni, a ti a. Banker te pawh Scheme tha tak tak beneficiary te hrilhhriat chu an mawhphurhna a ni tih an hriat thar leh a ngai a ni, a ti. Hei bakah hian Governor chuan Education-ah Mamit District chu tan an lak zual a ngaih thu leh Mizoram pum ang pawhin tan lak a ngai hle tih a sawi a. Education ah District dang te aia hnufual bik a nih avangin education lama hotute chu an theihtawp a hma la turin a hrilh bawk.

Mamit tlawhtu Governor hian nimin khan Mamit-a JNV School sak mek chu a hmunah a tlawh bawk a, chak zawka hna kal mek thawh dan tur chungchang hnathawktute leh District thuneitute a sawipui bawk.