MUP hnenah Oxygen Concentrator 29 semchhuak

Social Welfare & Tribal Affairs Minister Dr. K Beichhua chuan ‘National Action Plan for Senior Citizens' hnuaiah nimin khan Mizoram Upa Pawl (MUP) te hnenah Oxygen Concentrator a semchhuak.

SW&TA Minister Pisa-a Oxygen Concentrators semchhuahna hunah hian Dr. K. Beichhua chuan Oxygen Concentrator semchhuah a ni chu lawmawm a tih thu sawiin, Dam tha pangngai tan a ho viaua lang si, damlo leh upa lam tana tangkai tur tak a nih thu a sawi a. MUP leh Social Welfare Department chu kal ho zel tur niin phak tawka inpui reng tur an nih thu a sawi hnuah MUP President Lalhuapzauva kutah Oxygen Concentrators hi a hlan nghal a ni.

'National Action Plan for Senior Citizens' hnuaiah Social Welfare & Tribal Affairs Department chuan khaw thlanchhuah 29-ah Oxygen Concentrators hi semchhuakin, PHC leh Hospital awm lohna khua te ngaih pawimawh a ni. Kum upa hriselna lama harsatna neite bakah khawtlanga a mamawhte tana hman tura ruahman niin, khaw tina Upa Pawl awmte kutah hlan a ni a. Upa Pawl awm lohna khuaah Community Based Organisation-te kutah pek a ni thung.