Lirthei chuanman bithliah hmang turin hriattir

State Transport Authority (STA), Transport Department chuan Passenger phur chi lirthei neitu leh khalhtu zawng zawng te chu sawrkar-in chuanman (Fare) a siam te tha taka zawm vek turin a hriattir.

Hemi chungchanga tun thla ni 10-a thuchhuah an siamah mipui zin vei vak leh khawpui chhunga man chawia lirthei hmang te leh lirthei neitu te hriat tur tarlangin State Transport Authority (STA) chuan, Mipuite'n zin veivahna kawnga harsatna an tawh lohna turin State Transport Authority (STA) chuan passenger phur lirthei chi hrang hrang permit a pekchhuah thin thu leh lirthei permit diltute hi sawrkar rate zawm tur te, sawrkar phal loh thil phur lo tur te, STA in tlan tura a tihna hmun apiangah eng hunah pawh tlan turin an intiam thlap tih a tarlang a. Lirthei permit hmu reng reng chuan permit an lakchhuah rualin sawrkar rate aia sanga chuanman la lo tura an intiam thu leh, Sawrkar thu an zawm loh chuan permit cancel/suspend thleng an inhuam thu an sign thlap tih a tarlang a, “Passenger phur chi lirthei neitu/khalhtu te chu sawrkar-in chuanman (Fare) a siam te tha taka zawm vek tura ngen leh hriattir an ni,” a ti bawk.

Tuna Sawrkar rate dinglai chu hetiang hi a ni :

1. Auto Rickshaw - Kilometre khatna Rs. 30.00 a ni tur a ni a, chumi piah lam tlan chuan KM 1-ah Rs. 20 belh zel tur a ni.

2. Taxi - Kilometre khatna hi Rs. 50.00 tur a ni a, a bak zelah chuan KM 1-ah Rs. 40 zel a ni tawh ang.

3. Two Wheeler Taxi - Kilometre khatna hi Rs. 25.00 a ni ang a, a bak zelah chuan KM 1-ah Rs. 15 zel a ni tawh ang.