Union Minister in Mamit District a tlawh

Mizoram-a rawn zin Union Minister of State for Agriculture & Farmers Welfare Kailash Choudhary chuan nimin khan Mamit District tlawhin sawrkar Official te nen inkawmna an nei.

Union Minister hi Mamit Tourist Lodge-ah District Bawrhsap Lalnunhlua leh sawrkar mi pawimawh dang ten lo dawngsawngin hemi hnu hian DC Conference Hall-ah sawrkar hotu pawimawh te nen inkawmna an nei a, he hunah hian Union Minister Kailash Choudhary chuan Aspirational hnuaia Mamit District performance hrang hrangah thenkhata hmasawnna a thlen laiin thenkhatah an tlahniam thung tih a sawi a. Heng an hmasawnna leh an tlakhniamna chhante uluk taka chhuichiang a, a taka Gound Level-ah mipuite'n an chhawr ngei em tih an ngaihtuah chian fo a ngai tih a sawi a. “Eng thil mah felsa thlapin a awm thei lova, kan thil neih ang angte a tangkai thei ang bera hmang turin ruahmanna kan siam thiam a pawimawh a, chumi atana kan rilru puthmang te kan tihdanglam a ngai a ni,” a ti.

Tunhnaiah Mamit District chhunga khaw 20-ah Rawthing tâm avangin Sazu a puan mek thu leh tingtlang Lo nei mite'n an buh leh bal tharchhuah tur tam tak an chan mek thu he hunah hian tarlan niin hemi chungchang zirchiang turin a Ministry hnuaia mithiam bik Scientist te Mamit District-ah a rawn tirh tur thu Minister hian a sawi a. Lo nei mite'n Kuhva hring an tharchhuahte pawh Mizoram pawna awlsam zawka hralh anih theih nan theihtawpa hmalak anih tur thu a sawi bawk a. Lo nei mite tan Scheme hrang hrang siam niin PM Kisan leh Kisan Credit Card hnuaiah te a pung tlema Loan lak bakah tanpuina pawisa dawn theih a nih thu sawiin, heng scheme te hi zirchiang a, Mamit District chhunga Block 3-ah Farmers Producer Organisational (FPO) din a, theihtawpa hmalakpui turin Officials te a chah bawk.