Khawvel Sunday School ni

November thla Pathianni hmasa bera hman thin ‘Khawvel Sunday School Ni’ chu nimin khan urhsun taka hman leh a ni a, Presbyterian Kohhran leh Baptist Church of Mizoram (BCM) te chuan he ni hi Kohhran ni pawimawh ah chhiarin kumtin urhsun takin an hmang thin a ni. Sunday School hi kum 1780-ah khan England rama Gloucester-ah Robert Raikes-a’n a din hmasa ber a, India ramah July 9, 1803 atangin Sunday School neih tan a ni leh a. Mizo-ram-ah pawh Zosap Rev. D.E. Jones-a (Zosaphluia) hmalaknain February 20, 1898 atangin neih a ni bawk.