Kan ram tichhetu pakhat chu min bumtu kan la zui zel te hi a ni - Lalduhoma

ZPM Leader Lalduhoma chuan, “Kan ram tichhetu pakhat chu min bumtu kan la zui zel te, an tana thahnemngai taka kan la campaign hi a ni,” a ti.

Zoram People's Movement (ZPM) Kolasib Block buatsaih Block Conference leh Political Training nimin-a Kolasib Diakkawn YMA Hall-a neih a hmanpuina ah he thu hi sawiin ZPM Leader Lalduhoma chuan, “Engvangin nge kan ram a that theih loh kan tih chuan, an tha lo tih kan hriat reng pawh kan la vote zel hi a ni,” a ti a, “Hruaitu tha lo kan zui tlat te hi kan ram hian a tuar a. Hlemhletna hi kan hua a, thalai te chauh ni lovin Kohhran hial a auchhuak ta a, Central YMA te hial an auchhuak ta a ni. Sawrkar tha siam turin kan ram hi a insing sa mup mup a, inthlan hi Political Party ai mahin neutral hian an nghakhlel tawh zawk a ni,” a ti bawk. ZPM Leader chuan tunlai hian ZPM-ah luh duh mi thahnem tak an awm nia sawi bawkin, “Tunah chuan Opposition kan la ni rih a, kan member te pawh tih sak theih pakhatmah kan nei lo a ni. Chuti chunga mi thar kan neihte pawh hi ram siam that duh tak tak, hmui hmer beisei lo in ni tih a chiang hle a ni. Rawngbawlna rilru pu a kan ram tan lo penchhauk in ni tih a chiang hle a, a ram leh a felna zawngtute in ni a, hêng mi te hi Pathianin mal a sawm thin a ni,” a ti bawk.

He hunah hian ZPM Working President K. Sapdanga pawhin tuna kan MLA te lakah hian a tirah khan mipui beiseina a sang hle nia sawiin, “Mahse chanloh khan ah a chhuak tih ang maiin Board phuahchawp in hna bul tan a ni a, Mitsiai-a duhsak zawngte hna semna atan tih niawm tak a ni,” tiin “Tuna Mizoram in a mamawh hmanhmawh thlak ta ber  chu Chief Minister mumal neih a ni,” a ti a. ZPM chu mipuiten hnathawh kawr an haktir ve mial a nih chuan Dan a zalen tawh dawn tih pawh sawiin, “Chhungte sum hawha corruption chulmam mai mai a rem tawh lo ang. Sum indaihloh vanga harsatna kan tawhte sutkian dan awmze nei ber chu inrenchem leh sum hmanna tul lo 'cut' ngam hi a ni. Mipui chhiah chawi atanga rulh tur sum puk huai viau hi inrelbawl dan tha a ni lo,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar