Serchhip District-ah Sazu avanga harsatna thleng thei laka invenna atan theihtawp chhuah a ni

Serchhip-a Agriculture Department hotute chuan Sazu in buh a khawih avanga harsatna thleng Serchhip District chhunga khaw pali atanga an dawn tawh thu sawiin, tun atanga theihtawp chhuaha kan beih tlan chuan harsatna lian zawk thleng lo tura an beisei thu an sawi.
Mizoram hmun thenkhat ah Sazu ten Buh hmun an khawih avanga harsatna an tawh mek chungchangah Serchhip-a Asst. District Agriculture Officer (ADAO) R. Lalrinawma chuan Serchhip District chhunga khaw pali- Serchhip, Bungtlang, Neihloh leh Khawlailung khua atangin Sazu avanga harsatna thleng report an dawn tawh thu LENKAWL hrilhin, tunah hian Buh ala vui chiah loh avangin Buh chhia la awm lutuk lo mah se Buh kung te Sazu hian an eichhiat avangin Buh kung tam tak a chhiat tawh thu a sawi a. He harsatna thleng hi thuneitute hnenah thlen a nih tawh thu leh District Level Plants Protection Squad chu ADAO Serchhip kaihhruaina hnuaiah din ni tawhin, Vice Chairman-ah BAO East Lungdar bakah Member atan Agriculture Block aiawh, KVK aiawh, ATMA aiawh leh FOCUS aiawhte pawh dah an nih thu a sawi a ni.

Serchhip ADAO chuan District chhungah Sazu a puang nasa hle tih sawiin, heng khaw hrang hranga Zau hrang hrang atanga report an dawn thu a sawi a, a theih anga a hmunah tlawha hma an lak thin laiin report a tam tak deuh avangin a hmunah an tlawh vek theih loh thu leh Sazu hraina tur Tur te semin a theih anga Tur hman dan inzirtirna te pawh neih nghal zel a nih thu a sawi a. Sazu leh natna dang laka Buh venghim tura a hun taka chet lak a nih loh chuan a chak lo zawkah kan tang zel tih pawh sawiin, “Heng te beilet tur hian Tur hman a ngai a, Tur hi mihring leh kan ranvulh te tana vanduaina thlen thei a nih ve tho avangin uluk taka kan hman a ngai a ni,” a ti a. Loneitu ten Sazu avanga harsatna an tawk a nih chuan a rang lamin Department thawktute hnenah hriattir tur a nih thu leh Training te pein Sazu hrai hi tih vat tur a nih thu a sawi a. “Tunah hian Sazu hi pawi khawih tham awm lovin tlem tlem chauh la awm mah se reilote chhunga pung thut thei an nih avangin ngaihthah chi a ni lo,” a ti a, fimkhur taka theihtawp chhuaha kan tantlan chuan harsatna lian zawk pumpelh theih an inbeisei thu a sawi a ni.

Serchhip ADAO chuan hmun thenkhat ah Sazu ei duh avanga Sazu hrai duh lo an awm thin thu sawiin, “Sazu ei kan duh avanga thenawm te Buh him lova dah hi tih loh tur a ni,” a ti a, hmun hrang hrangah Sazu hrai a nih tawh avangin Sazu sa lo ei mai chu a him tawh loh thu te, Sazu thi hmu te pawhin thuk taka phum zel tur a nih thu te a sawi a. Heng Buh ei thin Saza te hi chawlhkar thum chhunga puitlingin chawlkar thum dang a liam leh chuan nasa taka an inthlahpun theih thu a sawi a, hei vang hian Sazu suat hna chu ngaih pawimawh a tul thu a sawi bawk a ni.

Comments

Popular News (Last 30 Days)

Vawiin-ah HSSLC Exam result