Mizoram-ah TB endikna tur khawl thar Culture & Drug Susceptibility Laboratory hawn a ni

Health Minister Dr. R. Lalthangliana chuan nimin khan District TB Centre, Falkawn-ah TB endikna khawl thar, Culture & Drug Susceptibility Laboratory a hawng a. TB test na khawl thar chuan rintlak zawka TB natna hmuhchhuah kawngah te, damlo ten damdawi an ngeih leh ngeih loh enzuina kawngah te a tangkai dawn tih a sawi.

Culture & Drug Susceptibility Laboratory hawnna hunah hian Health Minister Dr. R. Lalthangliana chuan National TB Elimination Programme hnuaiah TB endikna khawl thar hawn a ni ta chu lawmawm a tih thu sawiin, TB enkawlna chuan bungthar kaiin TB endikna khawl thar chu Mizoram-ah a hmasa ber tur a nih thu a sawi a, he khawl hi a nihna anga hman theih a nih hunah TB damdawi hrang hrang te damlo in a ngeih leh ngeih lo tur te a hriat theih vek dawn tih a sawi a ni. Dr. R. Lalthangliana chuan khawvel pum huapa TB umbo tumna kum 2030 aia kum nga hma, kum 2025-ah India ram chuan TB umbo a tum tih a sawiin, kum 2015 atanga khaikhinin kum 2025-ah chuan TB vanga thihna chu 90% a tihhniam a tum a nih bakah TB natna thleng thin chu 80% a tihhniam tum a nih thu sawi a. Mizoram atanga TB umbo turin hmalakna thui tak a la awm thu sawiin, kumin January atanga June thla chhung khan TB damlo 1000 chuang hmuhchhuah an nih thu leh heng atang hian MDR-TB vei 60 chuang hmuhchhuah niin mi 39 TB vangin an thi bawk tih a sawi a. Tanrualna leh tih tak takna nen TB umbo theih ngei a beisei thu a sawi bawk.

Dr. R.Lalthangliana chuan he khawl thar hman theih a nih atang chuan Guwahati-a sample thawn leh hun rei tak tak sen thin te, damlo enkawlna kawnga harsatna hrang hrang an tawh thin te chu sutkian a ni dawn tih a sawi a. TB natna chu Mizo ten kan ngaihthah tawh hle tih pawh sawiin, TB natna chu kan ngaihpawimawh thar a, a invenna kawngah kan tan thar a ngaih thu a sawi bawk.

TB endikna khawl C& DST Laboratory-ah hian Drug Resistant TB (MDR-TB) leh TB pangngai te hmuhchhuah theih a ni anga. TB damdawi ten TB hrik a that thei nge that thei lo tih te, damlo in damdawi a ngeih tur te zawn chhuah theih a nih bakah, TB damlo te an inenkawl laiin an damdawi ei lai an ngeih leh ngeih loh test zui reng nan hman theih a ni dawn a ni.