MZU-ah ‘Mizo Thu Leh Hla Ruaipui’ theh a ni

Mizoram University-a Department of Mizo chuan ni 3 chhung awh tur ‘Azadi Ka Amrit Mahotsav’ hnuaiah ‘Kutpui - Evolution Fest’ chu nimin khan an hmang tan a, nimin khan a bultanna atan MZU Auditorium-ah ‘Mizo Thu Leh Hla Ruaipui’ buatsaihih Higher & Technical Education Minister Dr. R. Lalthangliana chuan a hmanpui a ni.

‘Mizo Thu Leh Hla Ruaipui’ ah hian H&TE Minister chuan kan Culture, kan thu leh hla, kan tawng, kan hnam rohlu, kan Dan te leh kan kut themthiam thil zawng zawng te hi ni hnih khat leka kan thiam leh neih mai theih a ni lo tih sawiin, heng nei tur hian kawng thui tak kan lo zawh a ngai a ni tih kan hriat reng a tha hle tih a sawi a, chuvang chuan heng kan hnam rohlu thil chi hrang te hi kan hlut a kan roh hle a ngai a ni, a ti.

Dr. R. Lalthangliana chuan Mizo tawng min hmanpui hnamdang an tlem vangte, kan tawng kan ngaihsan tawk loh vangte hian kan tawng hian hliam na tak a tuar mek nia a lan thu a sawi a, he kan tawng hliam tuar mek hi a tidam theitu leh damdawi In pan ngai lova siam theitu chu mahni theuh kan ni tih a sawi a. “Mizo tawng hmangtu mihring kan pung zel a, hmangtu erawh kan tla hniam ve hret hret a; kum 1991 chhiarpuiah 78.12%, kum 2001-ah 75.92% leh kum 2011-ah chuan 75.72% a ni a. Mizo tawng hmangtu dinhmun hi a kiam chho hret hret zel a ni,” a ti a. UNESCO-in February ni 17, 2009-a a tihchhuah ‘Atlas of World Languages’ ah chuan Khawvelah tawng la nung mek 6000 vel a awm a, heng zinga a zatve thelh chu kum 2100 hmain a thi hman dawn nia an rin thu sawiin, “Dinhmun derthawnga awm tawng 2498 zinga 196 chu India ram hnam tenau tawng te a ni a, chung zinga 80 chu North East mite tawng a ni a, 80 zinga 13 chu Mizo hnahthlak tawng kan tih zinga mi an ni nghe nghe. Chuvangin Mizo tawng hi tawng ral mai tur dinhmunah a awm mek a. A vawnhim leh tihhmasawn chu Mizote tih makmawh a lo ni ta a. Chuvang chuan a hmang tur ber ten kan hman that duh loh chuan Mizo tawng hi dam lo enkawl ngai, hliam tuar leh chau tak, tihdam theih loh dinhmunah kan din tir thuai dawn a ni,” a ti bawk.

Mizo Thu Leh Hla Ruaipui hi hun hniha then niin hun khatna hi Seminar hawnna atan hman niin Prof. Laltluangliana Khiangte, Senior Professor, Department of Mizo, Mizoram University chuan thupui a thet (keynote address) a, Minister Dr. R. Lalthangliana'n Prof. Laltluangliana Khiangte lehkhabu ziah pahnih ‘Zo Lungthu Pathum’ leh ‘Mizo Thurochun’ a tlangzarh a, khualzahawm Prof. Lalnundanga'n Prof. Laltluangliana Khiangte lehkhabu ziah tho pahnih ‘Mizo Thu Leh Hla Chanchin’ leh ‘Mizo Tawng Chungchang’ a tlangzarh bawk a. Chawhnu lamah Seminar neih chhunzawm niin Resource Person atan mi 3 hman an ni bawk.

Comments

Popular posts from this blog

Tukverh-a tlasual boral