Mizoram-a ASF hri leng in ziaawm lam pan tawh

Animal Husbandry and Veterinary Department hotute chuan Mizoram-a African Swine Fever (ASF) Vawk pulhri leng mek chuan ziaawm lam pan tawh tih sawiin, Sanghal zinga a darh tawh avangin a bial a zim (endemic) tawha ngaih a ni, an ti a. Sanghal zinga a darh tawh chung hian he Vawk pulhri hi a la reh lova, rawn puang leh hluai thei tho a nih thu an sawi bawk.

Nikum March ni 21-a Lunglei District-a Lungsen khua a Vawk thite African Swine Fever (ASF) vang a ni tih hriatchhuah atanga tun thleng, thla 18 chhungin Mizoram-ah Vawk 44,300 chuang a thi tawh a. Nikum bul lama ASF hri leng avanga Vawk leh Vawkte 33,000 chuang a thih hnu-ah December thla tawp lamah khan a reh tawh anga ngaih a ni a. Kumin March thla khan he Vawk pulhri hi a leng nawn leh a. Nimin thleng khan Vawk leh vawkte 10,915 a thi leh tawh a, Vawk pulhri darh zel tur ven nan Vawk 9,939 zet chu suat a ni leh tawh bawk a. He Vawk pulhri hi Mizoram pumpui a khaw 149-ah a leng a ni.

Union Minister of Fisheries, Animal Husbandry and Dairying Parshottam Khondabhai Rupala a lo zin lai khan he Vawk pulhri danna hi pe turin an lo ngen tawh a, amaherawh chu a dilna lehkha hi Delhi lamah an la thawn lo ni a thudawn a ni bawk.