Faina Hapta hawnna neih a ni

Tunkar Inrinni thleng awh tur ‘Faina Hapta 2022’ hawnna chu nimin khan neih niin he Hapta hman chhung hian Veng fai inelna buatsaih a ni ang.
Faina Hapta hawnna Serchhip DC Meeting Hall-a neih ah hian Bawrhsap mawhphurhna la mektu Addl. DC Lalmuansanga Ralte chuan he Hapta hi hawngin Serchhip District chu Mizo-ram laili-a awm, faina kawnga inelna hrang hrangah pawh lawmman lo dawng tawh a nih thu sawiin, heng lawmman kan lo dawn tawh te hi mipuite thawhrah, khawtlang hruaitute, tlawmngai pawl leh chhungkaw tinte thahnemngaihna zara lo awm a ni tih a sawi a. Mihring ten bawlhhlawh kan nei ve zela, chung kan bawlhhlawhte chu mumal taka tihralna kan neih loh chuan mihring hriselna leh kan leilung ten an tawrh theih avangin tha thlah lova hma kan lak zel a tul thu sawiin, Faina Hapta chhung chauh nilovin kan ni tin nunah faina hi mitinten kan nunpui ngheh a tul thu a sawi bawk.


Kumin a Faina Hapta-ah hian ‘Bawlh-hlawh paih hmaa thliarhran’ tih chu thupui-a hman a nih thu pawh Addl. DC chuan sawiin, Faina Hapta chhung hian Veng/VC Area fai thlanna neih a nih dawn thu leh Faina kawnga mimal hma la tha thlanchhuah te hnenah lawmman siam a nih dawn thu a sawi bawk a. Mizoram-ah Faina in ngaih pawimawh a hlawh thu sawiin, UT kan nih hnu lawk kum 1977 atangin Faina Hapta hi lo hman a nih tawh thu leh bawlhhlawh tawih thei leh thei lo te chu sawngbawlna la nei lo mah ila bawlhhlawh thliarhran chu nunphung-a neih ngai a nih avangin tunah hian thliarhrang tura inzirtir chu a tul thu a sawi bawk.

Serchhip-a Faina Hapta hawnna hun hi Serchhip DIPRO K. Saitluanga chuan kaihruaiin UD&PA Department-a MIS Coordinator RC. Lalthianghlimi chuan Faina Hapta hman chhunga hun hman dan tur tlangpui leh he Hapta hman chhung hian Veng fai thlanna neih a nih dawn thu a sawi bawk a ni.

Comments

Popular posts from this blog

Tukverh-a tlasual boral