Latest News

Covid Volunteer te chawl ta

COVID-19 hri leng dona atana Serchhip District-a thawktu tura inpe te chu September thla tawp rual khan an hna thawh hun tihtawp a ni ta.
Kum 2020-a COVID-19 avanga harsatna a thlen hnuah Mizoram hmun hrang hrangah hlawh nei lova COVID-19 dona atana thawk tura inpe mi tam tak awmin Serchhip District-ah pawh a hmasa ber atan June 17, 2020 khan hri leng dona a thawk tura inpe hi an awm tan a, hemi hnu hian inpe awm belh zelin hri leng hluar zual lai phei chuan mi 30 rual zet inpe an awm a, heng te hi sawrkar chuan a theih anga lawmman te siam sakin hun rei fe an thawk a ni.

Amaherawh chu he hri leng hian ziaawm lam a pan chhoh hnuah hri leng dona a thawk tura inpe mi thenkhat chu chawlhtir zel niin a thawk zui te chu lawmman pawh mumal zawka pek zel an ni a. Tunah chuan hri leng in ziaawm lam a pan tak avang leh hri leng avanga inkhaihhruaina te sut a nih hnuah Volunteer te hi September thla tawp rual khan tihtawp an ni ve ta a, thawktu pangngai ten hna hi an thawk zui zel dawn a ni.

Volunteer te hna thawh a tawp thlenga thawk hi Serchhip District-ah Doctor pakhat, Staff Nurse 1, Lab. Technician 3, Health Worker pakhat leh Driver pahnih an awm a, Staff Nurse leh Driver pakhat hi Thenzawl-a thawk niin Health Worker hi East Lungdar-a thawk a ni a, midang zawng hi Serchhip-a thawk an ni.

Comments

Popular News (Last 30 Days)