Champhai Ruantlang-ah Live Animal Market hawng

AH&Vety Minister Dr. K. Beichhua chuan nimin zing khan Champhai Ruantlang-a Live Animal Market siam chu a hawng.

Live Animal Market hawnna hunah hian Dr. K. Beichhua chuan ram hmasawn leh thang apiangah Animal Husbandry & Veterinary a than zel thu a sawi a. Vawksa a intodelh theih nan pawnlam atanga Vawk lakluh leh natna kaichhawn ven kawngah theihtawp chhuah a ni, a ti a, ranvulh lama tanlak niin kum 2-3 hnuah intodelh a thawnchhuah tur thlenga kan ngaihtuah laiin thuawihlo an awm avangin Vawk hril engin min nuai a, tun dinhmun hi kan thleng ta a, ran vulh tihhmasawn leh sa a intodelh kawngah tanlak chhunzawm leh mek zel a ni, a ti. Dr. K. Beichhua chuan District hrang hrangah Vety Hospital-te hawn deuh vek tawh a nih thu sawiin, Champhai District Veterinary Hospital pawh zawh thuai tum a nih thu bakah District thar 3-ah pawh Vety Hospital, DVO Quarters leh Artificial Insemination kalpuina tur hmunhma te sak tum a nih thu a sawi bawk.

Live Animal Market Ruantlang hi NABARD Rural Infrastructure Development Fund-XXII (RIDF-XXII) atanga sum hmuh hmanga sak niin cheng nuai 260.84 sen a ni a, RIDF loan cheng nuai 246.50 leh State sum cheng nuai 14.34 te hmangin sak a ni a. Live Animal Market Ruantlang hnuaiah hian hna hrang hrang 20; Ran lian chawlh hahdamna tur In 2, Ran te zawkte chawlh hahdamna tur In pakhat, Laboratory, thawktute Quarters, Tuilakna, Inkalpawhna kawng leh tul dangte thawh a ni.

He hmunah hian ramri kaltlanga ran lakluhte chawl hahdama, hriselna endikna leh damlo enkawlna te siam a ni a. Heta tang hian ran hrisela pawmte chauh phurhchhuah phal a ni ang. Eizawnna siam thei tura duan niin, project enkawl zui zel kawnga mawhphur turte ruatfel a ni bawk. Ruahman dan chuan thla tin ran lian 33,605 leh ran te zawk 31,076 te daha, lut chhuak thei tura duan a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man