Bank te hmalak dan thlirho

Serchhip District chhunga Bank hrang hrang ten June, 2022 thla tawp Quarter thlenga hma an lak dan thlirletin nimin khan District Consultative Committee thutkhawm chu Serchhip DC Meeting Hall-ah neih a ni.
He thutkhawm District Bawrhsap Nazuk Kumar IAS kaihhruai a neih ah hian kumin June thla tawp thlenga District chhunga Bank hrang hranga sum dahluh leh loan an pekchhuah khaikhinna, CD Ratio dinhmun te thlirho a ni a, heng bakah hian KCC Loan hnuaia Line Department leh Bank hrang hrangte hmalakna bakah SHG leh Bank lam hmalak dan te, Sawrkar laipui Scheme hrang hrang hnuaia Bank in Loan an pekchhuah dan bakah a hlawhtlinna te thlirho a ni.

He huna tarlan a nih danin kumin June thla tawp Quarter thleng khan Pradhan Mantri MUDRA Yojana (PMMY) kaltlangin Rs. 50,000/- thleng Loan lak theihna Shishu hnuaiah mi 7, Rs. 50,000/- atanga cheng nuai 5 thleng Loan lak theihna Kishore hnuaiah mi 32 leh cheng nuai 5 atanga nuai 10 thleng lak theihna Tarun hnuaiah mi 13, an vaiin mi 52 te hnenah Loan cheng nuai 160.69 pekchhuah tawh a ni. Hei bakah hian Serchhip District-a Pradhan Mantri Jan Dhan Yojana (PMJDY), Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) hman tangkai a nih dan leh an hmalakna hrang hrangte pawh he hunah hian thlirho a ni bawk.