Union Minister in Mizoram a rawn tlawh

Union Minister of State for Rural Development, Consumer Affairs, Food & Public Distribution Sadhvi Niranjan Jyoti-i chuan ni thum chhung cham turin nimin khan Mizoram a rawn thleng a, nimin chawhnu khan Aizawl Vaivakawn-a Chawhmeh Bazar tlawhin Bazar a chawhmeh zuartute nen an inkawm.

Union Minister Sadhvi hian nimin khan Lengpui Airport rawn thlengin Rural Development Minister Lalruatkima'n a lo hmuak a, Chief Minister Zoramthanga Delhi zin tur nen Lengpui-ah hian an inkawm nghal bawk a ni. Lengpui atangin Vaivakawn Bazar panpui nghal niin Bazar a thlai thar zuarte tlawhin a kawm a, Vaivakawn bazar chanchin a lo hriat tawh thu leh nuho hlirin dawr an nghak tih a hriatin a tlawh chak hle tih a sawi a. Mizoram chu a thlen chinah nuam a tih thu leh ram mawi tak a ni tih sawiin, amah pawh thingtlanga pianga seilian, thingtlangnu a ni tih sawiin, “VIP angah pawh ka inngai lova, in zingah hian ka mikhual lo a ni,” a ti a. Prime Minister Narendra Modi-a'n India hmarchhak a ngaih pawimawh thu sawiin, ani thuchhuak anga rawn kal a nih thu a sawi a, Consumer ten harsatna an tawh angte a hnena an thlen chuan sutkiansak dan kawng a zawnpui tur thu a sawi bawk.

Bazar enkawltuten harsatna an thlen pakhat Vaivakawn Bazar building sak thatsak tura an ngenna chu Rural Development Ministry a chan a nih avangin Rural Area a awm chu ni se thupek a chhuah nghal theih thu leh Urban Area a awm a nih avangin Project proposal te an siam a nih chuan theihtawp chhuaha a lo bawhzuisak tur thu a sawi a ni.

Union Minister hi nizan khan Larsap nen inkawmin Raj Bhavan ah a riak nghal anga, Vawiin hian Mizoram-a 'Aspirational District' awmchhun Mamit District a tlawh dawn a ni.