Minister in Mizoram-a hmalakna te tarlang

Commerce & Industries Minister Dr. R. Lalthangliana chuan Hotel Hyatt, Gachibowli, Hyderabad-a ni hnih awh National Mines Ministers' Conference-ah Inrinni khan Mizoram-a leihnuai hausakna haichhuak tura hmalakna hrang hrangte a sawi.

Union Minister of Coal & Mines Pralhah Joshi hova hun hmanna ah hian Dr. R. Lalthangliana chuan Mizoram-ah Regional Coal Exploration nei tura hmalak mek a nih thu a sawi a, Coal India Ltd. Ministry of Coal hnuaia Central Mine Planning & Design Institute Ltd (CMPDIL) leh Mizoram Sawrkar hnuaia Directorate of Geology & Mining te chuan kum 2018 khan khan thawhhona thu thlungin an thawk dun tan tih sawiin, lungalhthei hi hmun/Block hnih a zawn tura ruahman niin Thinghlun/Lushaicherra, Mamit District-ah 33 sq. km a zau leh West Rotlang, Lunglei District-ah 48 sq.km a zauva zawn tur a nih tur thu a sawi a ni.

Minister chuan tun dinhmunah Directorate of Geology & Mining (DGM) in Draft Tender Document siam tawhin CMPDIL-ah kumin May thla khan thehluh a nih thu te, anni in lo endik tawhin Vetted Comment an lo pek angin siamrem ngaite siamrem a nih hnuah Notice Inviting Tender (NIT) tihchhuah a ni ang, a ti a. Lungalhthei zawn hi Company te tihtur niin a sum sen ngai tur zawng zawng 100% hi Central sawrkar tum tur niin Mizoram-a lungalhthei zawnna turah hian Directorate of Geology & Mining, Commerce & Industries Deptt. chu Nodal Department niin logistic support ngai zawng zawng an buaipui dawn a ni.

Mizoram chhunga Oil & Gas zawn hna pawh ONGC, Oil India (OIL) leh Vedanta Ltd. ten a thawh mek thu leh hemi chungchanga chak zawka hna thawh a nih theih nan Commerce & Industries Department, GoM chuan June ni 22, 2022 khan Joint Meeting nei tawh tih Minister hian a sawi a, he hunah hian Directorate General of Hydrocarbons (DGH) under Ministry of Petroleum & Natural Gas (MoPNG), ONGC leh Oil India Ltd (OIL) bakah Directorate of Geology & Mining Official an tel thu a sawi a. Hei bakah Oil & Gas zawn kawnga chak zawka hmalak a nih theih nan leh Oil leh Gas la zawn lohte Block hran siama Global Tender chhuah a nih theihna turin March 25, 2022 khan Directorate of Geology & Mining Director leh Deputy Controller of Mines te chu Directorate General of Hydrocarbons (DGH) Office, Noida (UP) a an kal thu a sawi bawk.

Dr. Thangtea chuan Union Mines Minister leh NE Mines Minister-te nen an inkawmnaa a rawt, North-East States Mines & Coal Ministers' Conference neih Union Ministe in rem tihsakin a hun atan October ni 28, 2022 a ruatsak chu lawmawm a tih thu a sawi bawk.