Mau tiak leina atana nuai 580

Mizoram sawrkar chuan Horticulture Department kaltlangin kum 2021-22 leh tun August (thla 17 chhung) thlengin Mau chi/tiak lei nan Rs. 5,80,96,750 a seng tawh.

  Assembly Session-a C. Lalsawivunga zawhna ziaka chhangin Horticulture changtu, Chief Minister ni bawk Zoramthanga chuan, Mau chi hrang hrang Dendro-calamus Brandisii, Dendrocalamus Sikkimensis, Dendrocalamus Longispathus te chin tir an ni tih a tarlang. Horticulture Minister tarlan danin, kum 2021-22 chhung khan sawrkarin Horticulture Department kaltlangin Dragon Fruit chinna atan Rs. 4,77,60,000/- a seng a, Balhla chinna atan Rs. 54,00,000/- sengin Mizo Hmarcha (Mizo chilli) chinna atan cheng nuai 30 leh Aieng (Turmeric) chinna atan cheng nuai 45 a seng bawk. Mizoram sawrkar chuan Horticulture Department kaltlangin thlai (Vegetable) bikah Zikhlum (Off-season Cabbage), Tomato, Dawnfawh leh thlasik thlai chi hrang hrang ah te hma a la mek a, thlai bik atan cheng nuai 100 ruahmanin, tunah hian hmalak chhoh mek a ni.