Electric Wiring zirna tan

Nimin khan Serchhip-ah ni 3 chhung awh tur Electric Wiring Training chu neih tan niin mi 44 ten training nei turin an hming an pelut a ni.
Serchhip Sub-Hqrs. YMA Training & Youth Affairs Committee leh Govt. Serchhip College-a Entrepreneurship Knowledge Cell (EKC) ten an buatsaih he Training hawnna hi nimin khan Govt. Serchhip College Smart Class Room-ah neih niin Serchhip Sub-Hqrs. President Kawlthuama chuan he Training hi a hawng a, Mizoram pumah YMA hmalakna in thiam thil bik nei tura training hi hmun hrang hrangah neih thin a nih thu leh Govt. Serchhip College leh YMA tangkawpa tun tuma hetiang training neih a ni chu lawmawm a tih thu a sawi a. Mizote chu themthiam tak, kan tuina lam anih a, rilru kan pe tak tak anih chuan thil thiam zung zung hnam kan nih thu leh Hnam thatchhia kan ni lo tih sawiin, tunlaia ruihhlo hluar mek dona kawngah kan vaia kan tanrual a tul thu a sawi bawk.

Training hawnna hun hi Govt. Serchhip College-a NSS Programme Officer C. Lalramliana chuan kaihruaiin College Principal K. Laldinpuii chuan lehkha zir chu thil tha leh pawimawh tak anih rualin eizawnna tlak a thiamthil bik neih chu hemi tluk zeta pawimawh a nih thu a sawi a. Thiam thil bik neih chu hnam dang tena min chimralna tur laka kan invenna atan pawh a pawimawh a nih thu sawiin, hei vang hian GSC pawh hian ngai pawimawhin Zirtawpni chawhnu apiangin hetiang lam zirna hun an ruahman thu a sawi leh mithiam hrang hrang sawm an nih thin thu a sawi bawk.


Ni thum chhung awh tur he Training-ah hian Serchhip Town chhunga YMA Branch tin atangin mi pahnih zel tel theih niin mi 44 an inziaklut a, hlawm thum-ah thenin a hmasa berah mi 15 ten training hi an nei anga, Trainer atan Dr. Jonathan Lalnunsiama, Asst. Prof. Govt. Serchhip College chu hman a ni dawn a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man