Serlui B Hydel Project in mamawh khawp tui hmu lo

Serlui B Tuikhuah kam ramngaw te a chereu nasat avangin Serlui B Hydel Project tuikhuah-ah mamawh zat tui a tling tawh lo a, hei hian kawlphetha siamchhuah a tihtlem zel thu Bilkhawthlir-a Thermal Project Division, Serlui B Hydel Project EE CC. Lalrinmawia chuan a sawi.

Bilkhawthlir-a Thermal Division Executive Engineer chuan Kolasib DC hova Meeting an neih hnuhnun ber tumin Serlui B Tuikhuah kam vel humhalh dan tur enfiah turin August thla chhungin luidung fan nise ti a an rel thu a sawi a. Serlui  kamah mi thahnem takin ramngaw vat chereu in huan nghet leh lo an neih  avangin ramngaw a chereu nasat thu a sawi a, hei vang hian tunah chuan tuikhuah-ah tui a pung chaklo hle tih sawiin, Serlui kam vel an vah chereu vangin tuihna a kangchat nasa hle ni a a hriat thu a sawi. EE chuan kumin June thla a Silchar-ah tuilian avanga an buai hle laiin tuikhuah-ah duh khawp tui tling tur pawh a awm lova, ramngaw hi humhalh that ni se tuihna hi a tam phah leh a beisei thu a sawi a, tun dinhmunah chuan van ruahtui tla ringawt a ring a ni deuh ber tawh niin a sawi bawk. 

Tun dinhmunah Serlui B Hydel Project-a khawl hi Unit 2 tlantir mek a ni a, nitin power Megawatt 6-7 an siam chhuak thei a, tui a tlem deuh changin khawl pakhatin an tlan thin a, khawl pakhat a an tlan hian nitin power Megawatt 3-4 an siam tlangpui thin a ni. Serlui B Hydel Project hi khawl Unit 3 a tlan tura ruahman a ni a, hetihlai hian a vaia tlan tur chuan tui a tam a ngai niin Thermal Power Division EE chuan a sawi bawk.