I-Day Football Final-ah HFC

Independence Day/Screening Football Tournament 2022 khelh mekah nimin khan 1st Division ten an match hnuhnung ber dawttu khelin Vawiin ah 2nd Division Quarter Final khelh a ni bawk ang.

Serchhip Sports Complex-a Independence Day/Screening Football Tournament 2022 khelh mekah hin 1st Division Club te hi intumkual theuh tur niin nimin khan an match 6-na an khel a, inkhel hmasa berah New Serchhip FC leh Vengchung FC te goal khat ve ve inpe in an in-hnehtawk a, H.Vanlalremruata chuan New Serchhip FC tan goal khung hmasa mah se Vengchung FC tan Lalhruaizela chuan a sut ve leh a ni.

Table mawng lama awm Bungpui FC Hriangtlang leh AWC FC te inhmachhawn ah AWC FC hian 4-3 a hnehna changin an dinhmun an siamrem zel a, Bungpui FC erawh match 6 an khelh ah point an la hmuh loh avangin Season thar-ah 2nd Division-ah aan tla dawn chiang ta  thung a ni. He inkhel ah hian Bungpui FC tan Lalhunruata chuan goal hnih khungin Ramdinmawia chuan goal khat a khung a, AWC FC tan Lalengliana chuan goal hnih khungin F. Lalhmangaihzuala leh Francis Zohmingmawia ten goal khat ve ve an khung bawk.

Nimin a inkhel vawi thumna ah Hmar Veng FC chuan Chanmari FC chu si nga fai-a sawpin Final an lut chiang ta thung a, Hmar Veng FC tan Lalhunthara chuan goal hnih a khung bakah Lalfamkima, Lalrinchhana leh Lalsawmkima te chuan goal an khung a, Hmar Veng FC hian match 6 an khelh ah tum 5 hnehna changin point 15 an hmu tawh a, an match hnuhnung berah chak lo pawh nise Final an lut chiang tawh a ni.

Nimina  inkhel hnuhnung berah FC Serchhip Kawnpui chuan Chhekhnai FC chu 2-1 in an hneh a, FC Serchhip Kawnpui goal hnih te hi Rodinsanga khung ve ve niin Chhekhnai FC tan Lalthuthlunga chuan goal khat a khung ve bawk a ni.

1st Division Team 8 ten match 6 theuh khelin Hmar Veng FC in Final an lut chiang tawh a, New Serchhip FC leh Vengchung FC in point 11 ve ve hmuin FC Serchhip Kawnpui in point 10 an hmu tawh a ni.

Vawiin hian 2nd Division ten Quarter Final an khel dawn a, zing dar 9:30-ah Keitum FC-I leh Dress Up FC inhmachhawnin dar 11:00-ah Kawn Veng FC leh Bungtlang Bazar FC an inhmachhawn anga, chhun dar 12:30-ah Field Veng FC leh Keitum FC-II inhmachhawnin inkhel hnuhnung berah P&E FC leh New Serchhip FC te an inhmachhawn bawk ang. 2nd Division-ah hian Quarter Final atang hian Knockout System hmanga khelh a ni tawh dawn a ni.

Comments

Popular posts from this blog

Volleyball S/F khel dawn