Hri kai enkawllai 36 la awm

Serchhip-ah ni hnih chhung COVID-19 hri kai hmuhchhuah thar chhinchhiah awm lovin nimin tlai thleng khan hri kai enkawllai pawh mi 36 an la awm mek.

Niminpiah Pathianni-ah Serchhip District-ah COVID-19 hri kai chhinchhiah thar an awm loh hnuah nimin khan hri kai thar an awm lo leh a, a zawnin ni 2 chhung hri kai hmuh an awm lo ta a ni. Hetihlai hian nimin khan Ser-chhip District-ah COVID-19 hri kai enkawl dam mi 19 an awm belh ve leh a, heng enkawl dam zinga mi 6 te hi Serchhip khua niin P&E Veng leh Bukpui-ah mi pahnih ve ve leh New Serchhip Venglai leh Tuikhuah Veng-ah mi pakhat ve ve te an ni a. Heng bakah hian Then-zawl atangin mi 5, East Lungdar-ah mi 4, North Vanlaiphai-ah mi 2 leh Khumtung leh Piler khua ah mi pakhat ve ve te an ni.

Heti hian nimin tlai thleng khan Serchhip District-a COVID-19 hri kai hmuhchhuah tawh chu 14,436 niin an zinga 14,365 te chu enkawl dam an ni tawh a, hri kai hmuhchhuah atanga chhutin za zela 99.40 te chu enkawl dam ni tawhin hri kai enkawllai mi 36 an la awm a, hri kai te zingah mi 35 an boral tawh bawk a ni.

Serchhip District-a khaw 9-ah COVID-19 hri kai enkawllai la awmin Khawbel khua chu hri kai enkawllai tamna ber la niin mi 13 an la enkawl mek a, East Lungdar-ah mi 7 an la enkawl bakah Serchhip-ah mi 5, Thenzawl leh Lungpho-ah mi 3 ve ve, North Vanlaiphai leh Thinglian-ah mi pahnih ve ve leh Sialhau leh Piler khua ah mi pakhat ve ve enkawl an la ni bawk.