2nd Division Q/F khelh zawh a ni
Nimin-a 2nd Division Quarter Final inkhel hmasa berah Keitum FC-I chuan Dress Up FC chu 5-1 a hnehin Semi Final an lut a, Keitum FC-I tan Lalthlanawma chuan goal thum khungin hattrick a siam a, Lalremsanga leh Nathan Lalramhluna ten goal khat ve ve khungin Dress Up FC tan Lalhmingchhuana chuan goal khat a khung bawk a ni.
Quarter Final inkhel vawi hnihna a Kawn Veng FC (Chhiahtlang) chuan Bung-tlang Bazar FC chu 4-3 a hnehin Semi Final an lut bawk a, Kawn Veng FC tan Lalzamlova, Laldinsanga, V. Lalhlimawma leh Rosangliana te chuan goal khat theuh khungin Bungtlang Bazar FC tan Ednand Lalropeka, Lalnuntluanga leh Lalchhanchhuaha ten goal khat theuh an khung bawk a ni.
Nimin a Quarter Final inkhel dangah Field Veng FC chuan Keitum FC-II chu 2-0 a hnehin Semi Final an lut bawk a, Field Veng FC tan Lalruatmawia leh Laldampuia te chuan goal khat ve ve an khung a. Nimin-a 2nd Division Quarter Final inkhel hnuhnung berah P&E FC chuan New Serchhip FC chu Penalty Shoot-out hmangin 5-3 in an hneh hram a, heng Team pahnih te hi hun pangngai ah goal inpe lova an inhnehthawk avangin Penalty Shoot-out hmangin chak zawk zawn a ni a, hetah hian P&E FC hi 5-3 in a vannei zawkah an tang ta a ni.
Vawiin hian 2nd Division Semi Final hi khelh nghal a ni dawn a, Chawhnu dar 1:40-ah Semi Final match hmasa zawk Keitum FC-I leh Field Veng FC ten an khel anga, dar 3:30-ah Chhiahtlang Kawn Veng FC leh P&E FC ten an khel leh dawn a ni.
1st Division hmawr bawk dawn hnai ta :
Vawiin hian 1st Division Club inkhel pahnih awmin inkhel result a zirin Final-a inhmachhawn tur hriat theih a ni dawn a, chawhma dar 10:00-ah FC Serchhip Kawnpui leh Chanmari FC inhmachhawnin dar 11:50-ah New Serchhip FC leh Hmar Veng FC an inhmachhawn dawn a. FC Serchhip Kawnpui hian Chanmari FC an hneh a nih chuan inkhel dang result a zirin Final an lut thei a, chutihrual chuan Chanmari FC hian point an hmu lo a nih chuan 1st Division Play-off an khelh a tul dawn thung a. Inkhel hnuhnung zawka inlan turnHmar Veng FC te hian Final an luh tawh laiin an khingpui tur New Serchhip FC hian hnehna an chang a nih chuan Final luh theihna hun remchang an la nei ve dawn bawk a ni.
Comments
Post a Comment