Thenzawl-ah Remna Ni hmang

Serchhip West Block MNF huaihawtin nimin khan Thenzawl Joint YMA Hall-ah Remna Ni hman a ni a, I&PR Minister Lalruatkima chuan a hmanpui a ni.

Thenzawl-a Remna Ni hmanna ah hian I&PR Minister chuan tu Party pawh sawrkar se remna leh muanna vawnnun tlat hi kan zavaia mawhphurna a ni tih sawiin, “Hnam pasalthate leh Martar-te hrereng chungin he ram hi a kal tur a ni,” a ti. I&PR Minister chuan Mipuite hi sawrkar ta kan nih thu leh sawrkar pawh mipui ta a ni bawk tih sawiin, Department hrang hrangte hmalakna tihlawhtlin a nih theih nan sawrkar hmalakna lo tawiawm zel turin mipuite a sawm a. “A fel ber berte kan ni hauh lovang, mahse tun dinhmunah chuan Pathian in MNF kutah he ram hruai hna hi a dah a. Kan thiam ang leh kan theih tawkin hmalam kan pan zel dawn a ni,” a ti.

Serchhip West Block MNF President Vanlalzawna kaihhruai he hunah hian I&PR Minister chuan Sawrkar Flagship Programme SEDP ruahman mek a ni tih pawh sawiin, “He SEDP hi ho mai maia hman a thiang lo a, dinchhuah nan kan hmang tur a ni,” a ti a, “Tumruhna, teirei peihna leh taimakna nen hma kan lak chuan kan dinchhuah-pui ngei ang,” a ti bawk.

North Vanlaiphai-ah pawh nimin khan Lersia Hall-ah Remna puala inkhawm hi North Vanlaiphai Group YMA buatsaihin neih a ni a, East Lungdar-ah pawh VC kaihhruaina in BRC Hall-ah Remna Ni hi hman a ni bawk.