Serchhip bawlhhlawh sawngbawlna tura ruahman COLFA ten a hmunah an rawn tlawh

Cheng nuai 60 senga Serchhip mipuite bawlhhlawh paih sawngbawlna hmun tur Chhiahtlang daia ruahman, Land Development for Solid Waste Management Centre chu nimin khan Mizoram Legislative Assembly-a Committee on Local Fund Accounts te chuan tlawhin hnathawh tawh dan leh hnathawh zel dan tur thawktute an sawipui.

Helai hmun tlawhtu Mizoram Legislative Assembly-a Committee on Local Fund Accounts (COLFA) te hi Serchhip District Bawrhsap mawhphurhna la mektu Lalmuansanga Ralte leh SP mawhphurhna la mektu Saidingliana Sailo bakah UD&PA Department hotute leh I&PR Department hotu ten lo dawngsawngin COLFA Chairman C. Lalmuanpuia MLA hovin an Member Nihar Kanti Chakma, C. Lalsawivunga leh Dr. Vanlaltanpuia te an rawn kal a. UD&PA Department-a thawktute nen inkawmna neiin he hunah hian an Chairman C. Lalmuanpuia chuan tunlai khawvel ah bawlhhlawh in harsatna min siam sak nasa a, kan changkang zela bawlhhlawh kan ngah tial tial a, mipui kan pung ve zel bawk a, hei vang hian bawlhhlawh sawngbawlna hmun tha kan mamawh thu leh COLFA pawhin an ngaih pawimawh thu a sawi a. Serchhip tana Solid Waste Management Centre tur sak meka thil hriat duh an neih hrang hrangte zawtin, helai hmunhma te hi an fangkual nghal bawk a ni.


Serchhip khawpui tana Solid Waste Management Centre hi Chhiahtlang atanga Lamchhip panna kawng, Tualthah Mual-ah buatsaih a ni a, Solid Waste Management Centre atan hian mimal ram 40,000 sq.m a zau chu cheng nuai 5-a lei niin a panna kawng atan hian Rs. 30,000/- in mimal ram lei leh a ni a, Special Assistance for Capital Expenditure Free Loan (SASCE) sum cheng nuai 60 hmangin a hmunhma leh panna kawng siam hna hi thawh niin H. Lalthianghlima, Chanmari Veng Serchhip chuan he hna hi a thawk a, he sum hmang hian a panna kawng meter 300 vela thui laiin PCC Slab hmanga chhun a ni a, Main Gate siam a nih bakah ft. 12X24 vela zau Site Office chu RCC hmanga sak a ni bawk a, ruahtui dahkhawlna tur Tui litre 27,000 vel lenna RCC Tanky, bawlhhlawh thliarna tur platform leh a hung hna te thawh tawh a ni bawk. Heng hna te hi kumin January thla khan thawh tan niin tunah hian hnathawh tur tlangpui chu zawhfel ni tawhin tun thla chhungin zawhfel vek hman beisei a ni.

Helai hmun tlawhtu Committee on Local Fund Accounts (COLFA) te hi Site Office-ah hian lo dawnsawn niin UD&PA Department-a Joint Director (Planning) HVL. Zarzoenga kaihhruaiin hun tawi te hman a ni a, he hunah hian SerchhipAddl. DC Lalmuansanga Ralte chuan COLFA member te lo lawmna thu sawiin, tuna an hnathawh chin chu kan thlen theih chin a nih mai avangin bawlhhlawh sawngbawlna changtlung tak siam a nih theih nana a theih anga ngaihtuahna senpui turin a ngen nghal bawk a ni.

Tun dinhmunah Mizoram-a khawpui (Urban Towns) zingah Aizawl leh Kolasib te chauh bawlhhlawh sawngbawlna hmun (Solid Waste Management Centre) nei an ni a, NLCPR sum cheng nuai 600 in Lunglei-ah hmalak mek niin State Plan Fund cheng nuai 400 in Champhai-ah hna thawh mek a ni bawk a. Hei bakah hian Special Assistance for Capital Expenditure Free Loan (SASCE) hnuaiah District 5- Serchhip, Mamit, Khawzawl, Saitual leh Hnahthial tan cheng nuai 60 theuh in a hmunhma tur hi buatsaih a ni leh a ni.


Serchhip tana Solid Waste Management Centre atan hian a tirah Lungrual ram a Mualkawi-ah 19,800sq.m a zau chu ruahman a ni a, amaherawh chu helai hmun hi Serchhip in Tuikum lui tui a lakna hnar lama awm a nih avanga sawiselna a awm avangin tuna ruahman mek ah hian a thar in hmalak leh a ni a. Helai hmuna bawlhhlawh sawngbawlna hmun nghet din tur hian mamawh hrang hrang la awmin, heng te neih theih dan tur ngaihtuah leh ala ngai dawn nia thudawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man