Sawrkar laipui-a mi pawimawh te dawr

Mizoram sawrkar-a Minister Dr. R. Lalthangliana chu New Delhi-ah cham mekin nimin khan sawrkar laipui-a mi pawimawh hrang hrangte a kawm a, Health & Family Welfare Board Vice Chairman Dr. ZR. Thiamsanga MLA leh Road & Infrastructure Development Board Vice Chairman Er. H. Lalzirliana ten an tawiawm a ni.

Dr. R. Lalthangliana hian nimin chawhma lam khan Ministry of Micro, Small & Medium Enterprises (MSMEs) dawrin MSMEs Secretary B.B. Swain a hmu a, Mizoram-a Industry hrang hrangte tihchangtlun a tul zia sawipuiin, Luangmual (Aizawl), Lunglei, Champhai leh hmun hrang hranga Industrial Growth Centre-te tihchangtlunna tura Project an thehluhte tihhlawhtlin ngei a nih theihnan theihtawp lo chhuah turin a ngen a, MSMEs Secretary hian chak taka bawhzui a tum thu a lo sawi a ni.

Hemi hnu hian Land Port Authority of India (LPAI) Chairman Aditya Mishra IPS hmu lehin Mizoram-a Border Trade tihhmasawnna chungchang thla kalta (June)-a Delhi a kal tuma a sawipui leh rawtna a thlen chungchangte a sawipui leh a, LPAI Chairman hian a ngenna an bawhzui thu sawiin, Kawrpuichhuah ICP tihchangtlunna tur DPR awm sa cheng vbc. 170 chu ennawn (revised) a nih hnuah cheng vbc. 552.25 a tihpun a nih thu a lo sawi a, he DPR hi kar hnih kalta khan Ministry of Home Affairs-ah an thehluh tawh thu leh a hlawhtlin ngei beiseina an neih san thu a lo sawi a, Zokhawthar LCS leh Zorinpui LCS tihchangtlunna tur DPR an siam mek thu a hrilh bawk a ni.

Ministry of Home Affairs-a Additional Secretary Piyush Goyal IAS pawh hmu nghalin LPAI-in Kawrpuichhuah ICP tihchangtlunna tur DPR an thehluh leh Border Trade kaihhnawih thil pawimawh dang an hnena thehluh te chak zawk leh awmze nei zawka lo bawhzui saka hma lo lakpui turin a ngen a, hei ngenna hi lo ngai pawimawhin theihtawp chhuah a tum thu MHA Additional Secretary hian a lo sawi a ni.

Hei bakah hian Ministry of External Affairs dawrin, Union Foreign Secretary Vinay Mohan Kwatra IFS nen nimin vek khan inbe bawkin Kawrpuichhuah ICP bakah Indo-Bangladesh Border Line-a Land Port Authority of India-in hmalakna chak taka an kalpui mek chungchang a sawipui bakah, awmze nei zawka hmalakna a kal chak theih nan he hmalakna in a kaihhnawih Ministry hrang hrang – Commerce & Industries, Home Affairs, Land Port Authority of India, External Affairs leh Bangladesh High Commission hotute nen inrawnhona ko tura ngenin, an tih theih chuan vawi khat thutkhawmah awmze nei takin thil a kalpui theih a beiseiawm tih a sawi a, Foreign Secretary chuan hei hi lo ngai pawimawhin a hma thei ang bera Meeting koh a lo tiam a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar