Remna Ni 2022 lawmna Serchhip-ah Assembly Deputy Speaker hovin neih a ni

India sawrkar, Mizoram sawrkar leh MNF ten Remna an ziahna ni champha, Remna Ni 2022 chu nimin khan Mizoram hmun hrang hrangah urhsun takin a lawmna neih a ni a, Serchhip-ah pawh P&E Veng-a BNRGSK Hall-ah Assembly Deputy Speaker Er. Lalrinawma hovin Remna Ni lawmna hi neih a ni.


Remna Ni lawmna Serchhip-a neih ah hian Er. Lalrinawma chuan British hnuaia India ram a awm lai khan Mizoram chu mahni-a ro inrelin-a awmin, India in zalenna a hmuh khan khatihlaia kan ram hruaitute khan ram an hmangaihna avangin engtia awmzui tur nge tih nasa raka ngaihtuahin, a tawpah kum sawm (10) dana ennawn leh thin turin India-a awm kha rem an ti rih tih a sawi a. Kum engemaw zat a lo vei hnuah ram hmangaihna avang bawkin India laka zalen duhna a lo awm leh thu sawiin, ‘Kan ram in khaw eng a hmuhna a nih dawn phawt chuan’ tiin mahni hrehawm pawisa lovin, thih ngamin zalenna an lo sual a, mi tam takin nunna an hlana, mi tam tak ramtuileilovin an awm a, mahni vanglai hun tha ramhnuaiah hmang zovin, chhuan tam tak chaw te an nghei a, an theih ang tawka sangin he ram tan hian an bei tih a sawi a, “Vawiin-ah hian khang mite kha zahna chibai kan buk a ni,” a ti a. Ram hmangaihna avang zelin kan ramin hun harsa a paltlang lai khan mi hrang hrang, party hrang hrang leh Kohhran te, Tlawmngai Pawl ten nasa takin mahni zawnah an beih thu sawiin, “Mipuite ngenna nasa tak avangin kum 1986-ah Remna kan lo nei ta a ni,” a ti.


Er. Lalrinawma chuan he remna hi Vawiin thlenga remna hlawhtling tia sawi hlawh a nih thu sawiin, remna duangtu kan ram hruaituten fing tak leh hmathlir thui tak neia remna an ziah avangin hmasawnna duhawm tak tak kan neih phah a, keini ho tan malsawmna a lo chang ta tih sawiin, Hnam leh hnamzia leh Sakhua humhimna dan tha takte, sum leh pai-a duhsakna te, University tha leh changtlung takte, High Court te leh thil dang tam tak kan nei chho tih a sawi a. “Buai lai hrehawmzia hre reng chungin remna hlutzia hi ngaihtuah thin ila, he remna chhawmnung zel tur hian theihtawp i chhuah zel ang u. Remna tel lo chuan hmasawnna a awm thei lova, kan ramin hma lam a pan zel theih nan remna leh muanna hi a pawimawh hmasa a ni,” tiin remna vawnghim zel tur leh ram tana inpe turin he huna kalkhawmte chu a chah a ni.

Serchhip-a Remna Ni lawmna hi Serchhip DIPRO K. Saitluanga chuan kaihruaiin Serchhip District Bawrhsap mawhphurhna la mektu Lalmuansanga Ralte chuan Remna Ni hi sawrkar in ngai pawimawh in sawrkar Pisa chawlh ah hial a puan thu leh hmun hrang hrangah a lawmna pawh buatsaih a nih thu a sawi a, Remna chu mi tu te emaw ta bik ni lovin Mizote ta, kan zavaia kan ta a nih thu a sawi a ni. Addl. DC chuan Mizoram in rambuai laia harsatna mipui pawisawi lo thlenga tawrhna a nasat thu pawh sawilangin, Mizo chhungkua a nghawng thu a sawi a, chutiang kara Remna leh muanna kan nei ta chu lawmawm a tih thu sawiin, Mizoram in hmasawnna chi hrang hrang kan neih te pawh Remna leh muanna kan neih vang a nih thu leh kan khawsak phung pawh a changkan chhoh zel thu a sawi a. Remna leh muanna kan neih hi a chhiat kan phal tur a ni lova, chhawmnuna vawnhim zel chu mitin ten kan mawh-phurh a nih thu a sawi bawk.


Serchhip-a Remna Ni puala Inkhawm ah hian Govt. Serchhip College Department of History-a Asst. Professor K. Vanlalpeka chuan 'Remna Ni chanchin leh pawimawhna' tih thupui hmangin Mizoram in ram buai a tawh dan leh Remna leh muanna a neih dan te a tarlang a, Peace Accord MNF Returnee Association (PAMRA) Serchhip District-a Vice President PC. Lianhnuna pawhin thu a sawi bakah Joint NGO Coordination Committee Chairman Kawlthuma pawhin thu a sawi a, he hunah hian sawrkar hotute leh sawmbik te an tel tha hle a ni.

Comments

Popular News (Last 30 Days)

LPG man bithliah thar