Minister tan Residential Internet Connection ruahman

Mizoram sawrkar chuan Minister-te tan an chenna In-a hman tur ‘Residential Internet Connection’ a ruahman sak a, chumi atan chuan thla khatah Rs. 2,000 aia tam lo a bituk.

He ruahmanna chungchangah hian Office Memorandum pawh chhuah a ni tawh. Mizoram sawrkara Principal Secretary GAD Navin Kumar Choudhary IAS-in June 29, 2022-a Office Memorandum a tihchhuaha tarlan a nih danin March 7, 2022-a Mizoram Legislative Assembly hnuaia General Purpose Committee (GPC) thukhawm leh Department of Information & Communication Technology (ICT) thurawn angin Minister-te tan Residential Internet Connection (mimal In-a Internet Connection) rem tih sak an ni a. Ruahmanna siam a nih dan chuan internet connection atan Rs. 2,000 aia tam lo chawisak an ni dawn a, hei hian telephone/mobile phone a huam dawn lo a. Internet connection siam theih zat chu Minister-te thu a ni dawn a ni. Hetihlai hian Internet Connection chu engzat pawh hmang se, a vai a chawi ngai zat chu Rs. 2,000 a pel tur a ni lo tih te Office Memorandum-ah chuan tarlan a ni.