COVID-19 hri kai enkawllai pung chho leh mek

Nimin tlai thleng khan Mizoram-ah COVID-19 hri kai enkawllai mi 567 lai an awm leh tawh a, Mizoram-a COVID-19 hri kai hmuh tawh atanga chhutin za zela 99.44 te chu enkawl dam an ni tawh a, thla hnih kalta chhunga hri kai enkawllai tam ber hun a thleng chho leh mek a ni.

Zirtawpni-a Mizoram-a Sample enfiah 253 atangin COVID-19 hri kai mi 61 hmuh an ni a, heng zinga 60 te hi Rapid Antigen Test hmanga hri kai hmuhchhuah niin midang pakhat hi TrueNat Laboratory atanga hri kai hmuhchhuah a ni thung a. Lunglei District-ah hri kai mi 30 hmuh niin Aizawl District-ah 18, Mamit District-ah 7, Serchhip District-ah 4 leh Hnahthial District-ah mi pahnih te an ni.

Inrinni khan Mizoram-ah Sample 366 enfiah leh niin heng atang hian COVID-19 hri kai mi 105 lai hmuh leh an ni bawk a, Sample enfiah atanga chhutin za zela 28.69 te chuan hri kaiin an vai hian Rapid Antigen Test hmanga hri kai hmuh te vek an ni a, Aizawl District-ah 52, Lunglei District-ah 24, Champhai District-ah 13, Serchhip District-ah 7 leh Mamit, Hnahthial leh Saitual District-ah mi pathum theuh an ni.

Inrinni khan Mizoram-ah COVID-19 hri kai enkawl dam mi 17 awmin nimin khan hri kai enkawl dam mi 46 an awm belh leh bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,29,775 niin an zinga 2,28,502 te chu enkawl dam an ni tawh a, hri kai hmuhchhuah atanga chhutin za zela 99.44 te enkawl dam ni tawhin hri kai enkawllai 567 an la awm a, hri kai zingah mi 706 an boral tawh bawk a ni.