Kumin November thla khian Serchhip-ah Salvation Army thalai khawmpui lian neih a ni dawn

Salvation Army thalaite intawhkhawmna lian, India Eastern Territory Salvation Army Youth (SAY) Congress vawi 26-na chu kumin November 18-20 chhung khian Serchhip-ah neih tum a ni a, Palai pawh mi sing chuang rawn kal tura beisei an ni.


India Eastern Territory Salvation Army Youth (SAY) Congress neih tur chungchangah hian Territorial Salvation Army Youth Council, India Eastern Territory hruaitute chuan Inrinni khan Serchhip rawn tlawhin MJA member te nen Serchhip Press Club-ah inkawmna an nei a, he hunah hian an Leader Maj. K. Rohlupuia chuan Salvation Army kalphung te tarlangin khawvel huap-a an hmunpui (Hqrs.) chu London-ah awmin hemi ang hian SAY pawh an din thu a sawi a. India ram hi Territory 6-ah then leh niin India Eastern Territory hian India hmarchhak leh North Bengal a huam thu sawiin, an Hqrs. chu Aizawl-ah a awm thu a sawi a. A hnuaiah Division 7 leh District pakhat awmin tuna neih tur Salvation Army Youth (SAY) Congress vawi 26-na Central South Division in a thlen tur a nih thu a sawi a ni.


Territorial Salvation Army Youth Council-a hruaitute chuan tun tuma SAY Congress vawi 26-na neih tur hi a tirah Aizawl-a neih tura ruahman a ni tih sawiin, amaherawh chu a hmun tura an ruahman hmasak building chu COVID-19 hri leng avanga sak chhunzawm kawnga harsatna an neih avangin kumin kumtir lam khan Serchhip-ah rawn kalin Leisekawt Mual-a nei turin ruahmanna an siam thu an sawi a, he khawmpui-ah hian an Territory huamchhung atang hian Palai mi sing khat chuang rawn tel tura beisei an ni tih sawiin, anmahni Kohhran lamah chuan inbuatsaihna an kalpui mek thu leh tunkar chho hian Serchhip bialtu MLA leh sawrkar mi pawimawh dangte pawh kawmin inbuatsaihna kalpui chhunzawm zel tur a ni tih an sawi a. Leisekawt Mual ah hian October thla tir atangin Pandal sa tura ruahmanna kalpuiin Pandal Structure awmsa an hman tur thu an sawi a, he khawmpui thlenna atan hian Budget cheng nuai 22 an siam thu leh mikhual inthlen chungchang ah pawh Zopa inthlen-a inthlen tur a nih thu an sawi a ni.

SAY Congress vawi 26-na ah hian thupui atan ‘ Khawvel - Pathian tan’ tih hman tur niin Nov. 18, 2022 (Zirtawpni) zan-ah tanin Nov. 20, 2022 (Pathianni) zan-ah an tiak dawn a, Speaker atan Col. Lalhmingliana, Territorial Commander chu hman tur niin inkhawmna neih apiangin thuchah ngaihthlak bakah item hrang hrang entir thin a ni dawn a. SAY hotute chuan Chhandamna Sipai pawl thalai inkhawmpui Serchhip-a nghah hi Pathian leh Serchhip khawtlang hruaitute bakah mipui tawiawmna zarah hlawhtling taka neih theih an inbeisei tih an sawi a. An Kohhran mipuite bakah Kohhran hrang hrangte leh tlawmngai pawl hrang hrangte chu tawiawma hmanpui turin an sawmin an ngen tih an sawi bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar