Health Clinic leh MHIP In hawng

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhunga Vanchengte khua tlawhin Health Clinic leh Vanchengte Branch MHIP In te a hawng.


Health Clinic thar leh MHIP In hawnna pual hian Health Clinic building-ah inkhawm neih niin he hunah hian bialtu MLA chuan COVID-19 hri leng karah Vangchengte khawtlang in thilthar pahnih a ruala an nei thei chu lawmawm a tih thu sawiin, Tuikum bial in Health & Wellness Centre leh Health Clinic an nei chho zel chu bial mipui aiawhin sawrkar chungah lawmthu a sawi a. Zirna, hriselna leh eizawnna te chu mipui ten kan mamawh dan inang lo mah se an pawimawh dan erawh a inang vek tih sawiin, tuna hawn tak Health Clinic pawh hi Vanchengte in an mamawh em em thil a ni tih a sawi a. Hetiang hmasawnna duhawm tak an neih theih nana khawtlang mipuite leh khawtlang hruaitute inlungrualna chu fakawm a tih thu leh Vanchengte mipuite inpekna pawh fakawm a tih thu a sawi bawk.

Bialtu MLA chuan MHIP ten an puala In an nei thei pawh chu a lawmpui thu sawiin, “Mizote nunphungah kan hmeichhia te pawi-mawh zia kan hre vek a, khawtlang leh chhungkua, ram hmasawnna leh inrelbawlna kawng tinreng ah an tangkai em em vek a, hma an sawn zel theih nana tanpui hi a tul a, kei ngei pawh ka inhuam reng a ni, nangni paw'n theihtawp lo chhuah zel ang che u,” tiin a chah a ni.

Health Clinic thar leh MHIP In hawnna inkhawm hi Vanchengte VCP Vanlalchama chuan kaihruaiin khawtlang hruaitute leh NGO's aiawh ten thu an sawi bakah VC Secretary Zokhuma chuan report a pe a, Health Clinic in Health Department atang pawmpuina/phalna an hmu thei chu lawmawm a tih thu sawiin, MHIP President Sangthangpuii pawhin MHIP In hmunhma an neih theihna tur leh sak zawh a nih theihna tura tanpuitu VC leh khawtlang mipuite chungah lawmthu a sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man