Bairabi leh Mamit inkar kawngpui National Highway-ah puan beisei a ni

Bairabi leh Mamit inkar kawngpui chu hun reilote hnuah National Highway atan puan beisei a ni.

Tunkar Thawhlehni khan Mizoram Rajya Sabha MP K. Vanlalvena leh Road and Infrastructure Development Board Vice Chairman Er. H. Lalzirliana MLA te chuan Union Minister of Road Transport and Highway Nitin Jairam Gadkari leh MORTH Secretary Giridhar Aramane chu an Office Chamber, Delhi ah kawmin Road Transport Department hnuaia Mizoram hmasawnna tur thil pawimawh chi hrang hrangte an sawi pui a. He hunah hian Bairabi leh Mamit inkar kawngpui chu Double Lane kawnga siam a tul thu leh National Highway-a puan ngei a tul thu Minister hnenah hian an thlen a. Minister chuan tihhlawhtlin ngei a nih tur thu lo sawiin, hun reilote hnuah National Highway atana puanna order tihchhuah a nih tur thu a sawi nghal tih sawrkar thuchhuah siam chuan a tarlang a ni.

Mizoram sawrkar mi pawimawh te hian MORTH Minister leh Secretary hnena an lo thehluh tawh thil dangte an bawhzui nghalin, Mizoram leh Manipur dawh zawmtu tur Tuivai Lei, Bailey Bridge tura ruahmanna lo awm tawh sa chu Modular Bridge 70R siam zawk tura tih a nih thu te leh 2022-23 budget-ah khung a nih tawh thu Minister hian a lo hrilh a. Tlabung bul Khawthlangtuipui chungah Lei dawh tur chungchang pawh DPR siam zawh a nih tawh thu te, Home Ministry leh Defence lamte nen a an lo sawiho tur thu te a sawi bawk a. Mara District chhim thlang tawpa Lawng kal theihna khua Lawngmasu thlenga Double lane kawng lai tura nikum lama ngenna an thlen tawh chungchang pawh sawiin, Zorinpui atanga Double Lane-a laihpawh a nih tur thute Minister hian a sawi nghal bawk a ni.

Sairang to Tripura kawng Double Lane laih mek pawh huntiam chhunga hna zawh a nih theih nan Contractor te hnenah a hun dikah bill pek a tul thin thu MP leh MLA te hian Union Minister hnenah hian an thlen bawk a. Lawngtlai to Sittwa Sea Port road KMMTTP laih mek chu National interest a nih avangin a hmun ngeia enfiahtu tur Team of MP tirh rawtna an thlen nghal bawk a ni.