Veterinary lama mithiam rawnna tur Call Centre hawng

Veterinary Doctor mamawhtu ten a rawn theihna tura duan 1962 Call Centre chu nimin khan AH&Vety Secretary Lalzarmawii chuan a hawng.

He Call Centre hawnna puala inkhawm hi Aizawl-a AH&Vety Council Conference Hall-ah neih a ni a, Call Centre-ah hian thawktu mi paruk - Call Centre Executive (Veterinary Doctor) leh IT Support Staff pakhat ve ve bakah Call Centre Agent 4 (VFA) an awm a. An hlawh hi sawrkar laipui tum vek tur a ni. Call Centre-ah hian Toll free number +913892314226 dah a ni a. He number hi Telephone Service Provider (TSP) zawng zawngin Animals in Distress Short Code 1962 hmanga biak theih turin ruahmanna an siam dawn a ni.

Toll Free number dial kher lovin awlsam takin 1962 dial in Call Centre hi biak theih a ni dawn a, Call Centre-a Call lo lut chu Call Centre Staff ten an lo chhang anga, a Call tu te mamawh ang zelin lo dawnsawn a ni ang. Call Centre a Doctor leh VFA te hian ranvulhtute harsatna lo dawngin a chinfel theih chu an tifel nghal ang a, Specialist rawn ngai a nih chuan Specialist hnenah chu call chu an pe chhawng ang. Call Centre hi Development Block tina MVU te nen an thawkho anga, a hmun a kal ngai chu MVU hnai ber an hriattir anga, MVU staff ten a hmunah an chingfel thin dawn a ni.

Sawrkar Laipui National Animal Disease Control Programme (NADCP) hnuaiah AH&Vety Department chuan Call Centre dinna tur sum Rs. 47,66,000 a dawng a. ICT Department berawnin Mizoram E-Governance Society te nen MoU an sign a. Mizoram E-Governance Society te hian Call Centre Architecture duan sakin, equipment leh software procurement te, installation leh staff training zawng zawng an buaipui a ni.