Tuikum bialtu MLA in a bial chhunga hnathawh a en

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhung Darlawng khuaa MLA Fund hmanga hnathawh hrang hrang tlawhin khawtlang hruaitute nen inkawmna an nei nghal bawk.

Tuikum bialtu MLA hian MLA Fund hmanga Darlawng khaw-chhunga inkalpawhna kawng PCC Flooring tih mek chu tlawhin hemi hnu hian SEDP hnuaia Darlawng khawtlang in Kuhva chinna hmun, Tuirini panna kawng laih mek a en nghal a, a bial mipuite khawngaihna leh duhsakna tam tak a dawn thin thuah lawmthu sawiin, Darlawng khawtlangin hmasawn zel tuma an beihna chu fakawm a tih thu a sawi a, Kuhva hmun zau tham tak buatsaih tuma an beih mekna pawh a hlawhtlin ngei a beisei thu leh a theih chin chinah a tanpui zel tur thu a hrilh a ni.

Khawtlang hruaitute nen an inkawmna ah Er. Lalrinawma chuan hriselna, eizawnna leh zirna te chu a ngaih pawimawh hmasak ber ber te an ni thu sawiin, a bial chhungah pawh heng thil pathum te a hmasawnna a awm theih nan theih-tawp a chhuah ve thin tih a sawi a. A Bial chhunga khaw hrang hrangte inkalpawhna tur hna engemaw zat thawh a nih tawh thu leh, tunhnaiah Baktawng khua leh Ngentiang-ah Helipad an siam belh thu sawiin, bial mipuite pawhin an hlut thiam hle nia a hriat thu a sawi bawk.

Deputy Speaker chuan Hriselna lamah Health Clinic leh thawktute indaihlohnate pawh a theih ang anga hmalak zel a nih thu sawiin, “Zirna School thuamthat ngai kan thuamtha a, tunhnai maia result chhuak atangte pawhin zirlai naupang ten hlawhtlinna duhawm tak tak an hmu tih kan hria a ni. Heng hmalakna kan neih theih chhan leh hmasawn duhawm tak tak kan hmuh theihna chhan hi bial mipuiten min thawhpui that vang a ni tih a chiang hle bawk,” tiin a bial chhunga hma-sawnna tunhnaia thawhte a tarlang a. An tanrualna Pathian in mal a sawm niin a sawi a ni.