Serchhip Police ten Serchhip-a zirna In-ah Dan chi hrang hrang zirhona an kalpui mek

Serchhip District Police te chuan Serchhip khawpui chhunga zirna In hrang hranga zirlai naupangte tan tunlai hian Legal Awareness Campaign an nei chho mek a, a remchan angin District chhunga khaw hrang hrangah pawh neih chhunzawm tura ruahman a ni.

Serchhip Police te leh District Education Officer (DEO) Serchhip ten ruahmanna an siam anga Serchhip Town chhunga zirna In hrang hranga Legal Awareness Campaign neih hi June 8, 2022 khan Presbyterian English School, Serchhip-ah neih tan niin Marian H/S, Govt. Higher Secondary School Serchhip, Brilliant Higher Secondary School Serchhip, Chawngbuangi Memorial School, Chhiahtlang Higher Secondary School leh Zoluti Memorial H/S Serchhip-ah te neih a nih hnuah nimin khan Govt. H/S Serchhip-ah neih chhunzawm leh a ni a, Vawiin hian Govt. PCR H/S-ah te neih leh tura ruahman a ni bawk a. Heng zirna In hrang hranga Dan inzirtirna neih ah hian Serchhip Police te atangin Resource Person tur insiamin mipuite leh zirlaite tana hriat tur Dan pawimawh hrang hrangte zirho thin a ni.

Nimin-a Govt. H/S Serchhip-a Legal Awareness Campaign neih ah hian Serchhip Police te atangin SI John Zohmingthanga Chhangte chuan he huna kalkhawm zirlaite hnenah Dan chi hrang hrang hriat a pawimawh thu sawiin, tunhnaiah Serchhip-a ruihhlo hmansualna a hluar thu a sawi a, hemi chungchanga Dan bawhchhia te hremna, The Narcotic Drugs and Psychotropic Substances Act, 1985; ND&PS Act tia hriat lar chungchang sawifiahin, hetiang ruihhlo hmansual hi a nghawng a nat thu leh tihchhin atanga ngawlveina a lo awm thin avangin zirlaite chu tihchhin a pawi zia hre reng turin a chah a. Heroin No. 4 ngawlvei chu a hautak thu pawh sawiin, sum leh pai a hautak avangin hausa deuh tan pawh sum neih in tlin loh chin neiin, hei hian ruk ruk a ti hluar hle tih a sawi a, kumin a Serchhip Police ten thubuai chi hrang hrang an ziahluh zinga a zatve aia tam chu ruk ruk kaihhnawih a nih thu a sawi bawk.

Heng bakah hian hursualna laka naupangte venhimna Dan, Protection of Children from Sexual Offences (POCSO) Act, 2012 chungchang te; The Wildlife (Protection) Act, 1972-in nungcha a humhalhna Dan te, Luidung-a Sangha humhalhna Dan, The Mizoram Fisheries Act, 2002 chungchang te; Inchhungkhur-a hleilenna laka hmeichhia te venhimna Dan, Protection of Women from Domestic Violence Act, 2005 chungchang te, Silai khuahkhirhna The Arms Act, 1959 chungchangte leh lirthei khalhtute tana hriattur Traffic Rules chi hrang hrangte he hunah hian zirho a ni.